Mu ijoro ryo ku wa kabiri, tariki ya 29 Ukwakira, inkongi y’umuriro yibasiye ububiko bw’uruganda Sun Belt Textiles Rwanda, ruherereye mu cyanya cyahariwe inganda mu karere ka Bugesera.
Amakuru avugako ko hahiye ibitambaro birenga ibihumbi 180 bikoreshwa mu kudoda ibiryamirwa birimo amashuka n’ibiringiti.
Polisi y’Igihugu ishami rishinzwe kuzimya inkongi, yihutiye kuhagera ifatanya n’abaturage kuzimya, byatumye umuriro utabasha kugera mu gice kinini cy’uruganda.
Kugeza ubu ntiharamenyekana icyateye iyi nkongi y’umuriro cyane ko yabaye mu masaha y’ijoro abakozi bose batashye.
Polisi y’u Rwanda irasaba abantu kwirinda uburangare bw’ibishobora guteza inkongi, ndetse isaba ibigo n’abantu ko bagomba guhora biteguye bafite ibikoresho by’ibanze birimo Kizimyamoto cyangwa se umucanga w’umutse.
Abaturage nabo barasabwa kujya bihutira gutanga amakuru mu gihe hari ahagaragaye inkongi z’umuriro.
