Umutoza w’amakipe y’Igihugu y’u Rwanda ya volleyball mu bagore n’abagabo, umufaransa Frédéric Guérin yahamagaye abakinnyi 20 bagiye gutangira imyitozo yo kwitegura imikino y’Igikombe cya Afurika cya volleyball mu bagore kizabera muri Kenya mu kwezi gutaha kwa Kanama 2026.
Umutoza Frédéric Guérin yatangaje urutonde rw’abakinnyi bahamagawe mu gitondo cyo kuri uyu wa Kabiri tariki 14 Nyakanga 2026, rwiganjemo abakinnyi bahamagawe bwa mbere mu ikipe y’Igihugu ndetse baturutse mu makipe 4 gusa ariyo APR WVC, Police WVC, Kepler WVC na RRA WVC.
Mu bakinnyi 20 bahamagawe mbere y’uko hatangazwa urutonde ntakuka rw’abakinnyi bazagenda harimo abakinnyi 7 ba APR WVC, abakinnyi 6 ba RRA WVC, abakinnyi 4 ba Police WVC n’abakinnyi 3 ba Kepler WVC.
Mu bakinnyi bahamagawe bwa mbere mu ikipe y’Igihugu barimo abasaranganya imipira (Setters) babiri aribo Ndagijimana Nancy wa RRA na Mpuhwezimana Diane wa APR, abakina hagati (Middle blockers) 2 aribo Umutoni Anitha na Uwiragiye Sandrine bombi ba RRA.
Abandi bakinnyi bashya bahamagawe mu ikipe y’Igihugu barimo abakina bataka (Outside hitters) 3 aribo Uwase Claire wa Police, Tuyizere Angelique wa Kepler na Tuyishimire Aloysia wa RRA, Nyirahabimana Divine wa APR ukina inyuma (Opposite hitter) n’aba-libero 3 Kabatesi Judith wa APR na Uzamukunda Fillette wa Kepler.
Benshi muri aba bakinnyi bashya bahamagawe mu ikipe y’Igihugu ni abakinnyi bakiri bato batanga ikizere cy’ejo hazaza ha volleyball y’u Rwanda mu bagore.
Umutoza Frédéric Guérin ugiye gutoza imikino ye ya mbere azaba yungirijwe na Hatumimana Christian usanzwe utoza Police na Igihozo Cyuzuzo Yvette usanzwe ari umutoza wungirije wa APR VC naho uzaba ushinzwe kongerera ingufu abakinnyi ni Murangwa Usenga Sandrine.
Mu Gikombe cya Afurika cya 2023 u Rwanda rwatozwaga na Paulo de Tarso Milagres rwasoreje ku mwanya wa 4.
