APR VC yatangiranye intsinzi muri Shampiyona Nyafurika yʼAmakipe yʼAbagabo muri Volleyball (CAVB Menʼs Club Championship 2026) itsinda Black Rhinos amaseti 3-0 (25-18, 25-10, 25-11).
Uyu mukino wafunguye iri rushanwa riri kubera mu Rwanda ku nshuro yaryo ya 47, wabereye muri BK Arena ku mugoroba wo ku wa Gatatu tariki ya 22 Mata 2026.
Ni umukino witabiriwe na Perezida wa Repubulika Paul Kagame n’abandi bayobozi mu nzego zitandukanye, n’abanyarwanda bari bashyigikiye iyi kipe y’Ingabo z’Igihugu.
Uyu mukino watangiye nyuma y’ibirori byo gufungura iri rushanwa ribereye bwa mbere mu Rwanda, ryitabiriwe n’amakipe 24 yo mu bihugu 14 bya Afurika.
Perezida w’Ishyirahamwe ry’Umukino wa Volleyball mu Rwanda, (FRVB), Ngarambe Raphaël, yavuze ko Igihugu cyishimiye kwakira CAVB Menʼs Club Championship 2026, irushanwa riri mu akomeye ku Mugabane wa Afurika.
Yasabye Abanyarwanda gushyigikira amakipe ahagarariye Igihugu kugira ngo Igikombe cya CAVB Menʼs Club Championship 2026, kizasigare i Kigali.
Ati “Muze kudushyigikira. Iki gikombe cyageze hano, ntikizave hano. Turabasaba ubufatanye bwanyu, abakinnyi bariteguye kandi bafashijwe na Minisiteri ya Siporo, Guverinoma na mwe. Iki gikombe kigomba kuguma aha.”
U Rwanda ruhagarariwe na APR VC iri mu itsinda A, Kepler VC iri mu itsinda B Police VC iri mu itsinda C na REG VC iri mu itsinda D.
