Ikigo cy’Igihugu cy’Ibarurishamibare (NISR), cyatangaje ko ingo zifite amashanyarazi mu Rwanda zikubye kabiri zigera kuri 72% muri 2024, zivuye kuri 34% zariho mu 2017.
Ubu bushakashatsi bugaragaza ko ingo zigerwaho n’amazi meza zageze kuri 90%, zivuye kuri 87%, mu gihe abakoresha gaze mu guteka bageze kuri 5%.
Ubushakashatsi bugaragaza ko ingo zitunze telefoni ngendanwa mu 2006 zari 6.2%, iki gipimo kiriyongera kigera kuri 67% mu 2017, mu mwaka wa 2024 cyageze kuri 85%.
Uku bwiyongere bwagaragaye cyane mu bice by’icyaro, aho imibare yavuye kuri 62% mu 2017 igera kuri 81% mu 2024, naho mu mijyi iva kuri 89% mu 2017 igera kuri 94% mu mwaka wa 2024.
Ikoreshwa rya murandasi naryo ryarazamutse, aho muri 2024 ingo zifite murandasi mu gihugu hose zageze kuri 30%, zivuye kuri 17% zariho muri 2017.
Mu bice by’icyaro, zavuye kuri 12% zigera kuri 19%, naho mu mijyi zavuye kuri 38% zigera kuri 57% mu mwaka wa 2024.
Umuyobozi Mukuru wa NISR yavuze ko aya makuru agaragaza uko igihugu gikomeje kwagura imiyoboro y’itumanaho no kongera ikoreshwa ry’ikoranabuhanga muri gahunda yiterambere u Rwanda rwihaye.
