Imikino y’umunsi wa munani wa Shampiyona y’Icyiciro cya Mbere mu Rwanda, BK Pro League 2026/2027, irakomeza kuri uyu wa Kabiri, tariki ya 3 Ugushyingo 2026, hakinwa imikino ibiri ikomeye irimo Kigali FC na Mukura Victory Sports ndetse na APR FC na Gasogi United.
Umukino wa mbere urahuza Kigali FC na Mukura VS, aho Kigali FC ishaka kuzanzamuka nyuma y’ibyumweru bitayigendekeye neza, mu gihe Mukura VS yo ishaka gukomeza kwitwara neza kugira ngo idatakaza umwanya mu makipe ahatanira imyanya yo hejuru.
Kigali FC iri ku mwanya wa nyuma n’amanota ane mu mikino itanu imaze gukina. Iyi kipe iheruka gutsindwa na Kiyovu Sports ibitego 2-0, ikaba ikeneye intsinzi kugira ngo yongere icyizere no kwigobotora imyanya yo hasi.
Mukura VS yo iri ku mwanya wa gatatu n’amanota 11 mu mikino itandatu. Iheruka kunganya na Al Merrikh SC igitego 1-1, ikaba ishaka gusubira mu nzira y’intsinzi kugira ngo ikomeze guhatanira imyanya ya mbere.
Mu mikino itanu iheruka guhuza aya makipe, Mukura VS yatsinzemo umwe, indi ine irangira ari amakipe anganyije. Umukino uheruka wabaye muri Mata 2026 warangiye banganyije igitego 1-1.
Undi mukino utegerejwe ni uhuza APR FC na Gasogi United saa 19:00 kuri Kigali Pelé Stadium.
APR FC iraza muri uyu mukino nyuma yo gutsinda Etincelles FC ibitego 2-0, ikaba ishaka gukomeza umusaruro mwiza no kongera amanota muri shampiyona.
Ku rundi ruhande, Gasogi United irashaka guhagarika imikino itarimo intsinzi, kuko mu mikino itanu iheruka muri BK Pro League yanganyije itatu itsindwa ibiri. Mu mukino wayo uheruka, yatsinzwe na Al Hilal SC ibitego 2-0.
Amateka y’imikino yahuje aya makipe kuva Gasogi United yazamuka mu Cyiciro cya Mbere mu 2019 APR FC imaze kuyitsinda inshuro nyinshi. Mu mikino 17 aya makipe amaze guhura, APR FC yatsinzemo umunani, Gasogi United itsinda umwe, indi umunani irangira banganyije
APR FC yatsinze Gasogi United ibitego 3-2 mu mukino wa mbere wahuje aya makipe mu Ukuboza 2019. Mu yindi mikino iyi kipe zingabo yatsinze harimo 2-0 yo mu Ukuboza 2021, 2-0 muri Werurwe 2022, 1-0 muri Gashyantare 2025, 1-0 mu Ukwakira 2024, 2-0 mu Kuboza 2025, 3-0 muri Gashyantare 2026 na 4-0 muri Werurwe 2026.
Gasogi United yo yanditse amateka yo gutsinda APR FC bwa mbere mu Gikombe cy’Amahoro tariki ya 12 Werurwe 2026, iyitsinda igitego 1-0. nyuma APR FC yaje kuyitsinda ibitego 4-0 mu mukino wo kwishyura.
Mu mikino itanu iheruka guhuza aya makipe muri BK Pro League, APR FC yatsinzemo itatu, indi ibiri irangira ari amakipe anganyije. Nta ntsinzi urubambye ingwe rurabona muri iyi mikino.
Ibi bituma umukino w’uyu munsi uba ingora bahizi kuru bambyingwe ruri gushaka intsinzi imbere ya APR FC, mu gihe iyi kipe y’Ingabo z’Igihugu ishaka gukomeza kwigaragaza no kongera amanota muri shampiyona.
Ikindi kizaba gikurikiranwa muri uyu mukino ni uko rutahizamu wa APR FC, Djibril Ouattara, azitwara. Uyu mukinnyi afite ibitego bibiri muri shampiyona, akaba ashaka kongera umusaruro we kugira ngo yegere Junior Kameni wa Rayon Sports umaze gutsinda ibitego bine na niyibizi Ramadhan wa Marine Fc.
