Raporo nshya y’Ishami ry’Umuryango w’Abibumbye ryita ku biribwa n’ubuhinzi (FAO) yagaragaje ko urubyiruko ari inkingi ya mwamba mu guhindura urwego rw’ubuhinzi, kongera umusaruro no guteza imbere imirire iboneye ku Isi.
Iyi raporo yiswe “The Status of Youth in Agrifood Systems”, yasohowe muri Nyakanga 2025, yerekana ko urubyiruko rugera kuri 85% ku Isi rutuye mu bihugu bikiri mu nzira y’amajyambere, cyane cyane ku mugabane wa Afurika no muri Aziya.
FAO ivuga ko uru rubyiruko rufite ubushobozi bwo guhindura ubuhinzi, by’umwihariko mu kongera umusaruro no guteza imbere imirire iboneye, cyane cyane muri ibi bihe Isi ihanganye n’ingaruka z’imihindagurikire y’ibihe, ubushomeri n’izamuka ry’ibiciro by’ibiribwa.
Raporo igira iti: “Iyo urubyiruko rwose rwabona akazi keza, urwego rw’ubuhinzi n’ubworozi rushobora kwinjiza hafi miliyari $650 ku musaruro mbumbe w’isi (GDP).”
Nubwo rufite amahirwe menshi, raporo ivuga ko urubyiruko rukunze guhura n’imbogamizi zirimo imirimo itarimo umutekano n’amasezerano, kutagira uruhare mu byemezo bibareba, kubura amahirwe yo kubona ubumenyi n’ikoranabuhanga rigezweho, ndetse no gukumirwa hashingiwe ku gitsina cyangwa inkomoko.
FAO yemeza ko urubyiruko ari urufunguzo rwo kubaka ubuhinzi burambye butangiza ibidukikije, bushingiye ku ikoranabuhanga rigezweho. Ikindi ni uko uru rubyiruko ari rwo ruzaba igice kinini cy’abaguzi b’ejo hazaza, bashobora guteza imbere ibiribwa bikomoka ku buhinzi burengera ibidukikije.
Mu bisubizo FAO itanga, isaba guverinoma n’abafatanyabikorwa kongera ishoramari mu guteza imbere ubumenyi n’ikoranabuhanga ku rubyiruko, gutanga amahugurwa ajyanye n’isoko ry’umurimo, korohereza urubyiruko kubona ubutaka n’inguzanyo, ndetse no guteza imbere uburyo bwo kugira ijambo mu byemezo bibareba.
FAO ivuga ko n’ibikorwa neza urwego rw’ubuhinzi rushobora kuba umusingi ukomeye wo kubaka ejo hazaza heza ku rubyiruko n’isi muri rusange.
