Minisitiri w’Urubyiruko n’Iterambere ry’Ubuhanzi, Dr Utumatwishima Jean Nepo Abdallah, yashimye umuhanzi Nzaramba Eric uzwi nka Senderi International Hit, umaze imyaka 20 asusurutsa Abanyarwanda binyuze mu ndirimbo z’Uburere Mboneragihugu.
Ni ubutumwa yatanze abunyujije ku rubuga rwa X, aho yashimye uruhare rwa Senderi mu gutanga ubutumwa bwubaka Igihugu, anashishikariza abafatanyabikorwa b’imyidagaduro n’abaterankunga kujya bibuka abahanzi baririmba indirimbo zifite ubutumwa bwubaka nk’iza Senderi.
Mu mashusho yerekana uyu muhanzi ari gutaramira imbere y’abakunzi b’ibihangano bye babarirwa mu bihumbi mu rugendo arimo rwo kwizihiza imyaka 20 amaze mu muziki, Minisitiri Dr Utumatwishima yashimangiye ko yanyuzwe n’umusanzu wa Senderi mu gutanga ubutumwa ku baturage abinyujije mu nganzo ye.
Yagize ati “Wakoze Senderi International Hit ku myaka 20 ususurutsa abaturage, mu ndirimbo z’Uburere Mboneragihugu.’’
Yashimiye abahanzi n’abandi bafasha Senderi mu bitaramo bizenguruka mu bice bitandukanye barimo Intore Tuyisenge, Justin Nsengimana na Didace Turirimbe.
Dr Utumatwishima yavuze ko Senderi adakwiye kwirengagizwa n’abategura ibitaramo bigari kuko ari umwe mu bahanzi bafite ibihangano byuzuye ubutumwa kandi bikunzwe na benshi.
Ati “Abaterankunga mujye mwibuka injyana z’uburere.’’
Nubwo atabikomojeho, Dr Utumatwishima yacaga amarenga ko abahanzi nka Senderi bakwiye kujya bifashishwa mu bitaramo bigari na bo bakabyungukiramo mu buryo bw’amafaranga.
Kuri ubu abahanzi 7 bari mu bitaramo bizenguruka Igihugu bya MTN Iwacu Muzika Festival, aho bamaze gutaramira mu Turere twa Musanze na Gicumbi mu Ntara y’Amajyaruguru.
Ku rundi ruhande, Senderi ari gukorera ibitaramo byo kwizihiza imyaka 20 amaze mu muziki, aho azazenguruka uturere 13 tw’u Rwanda.
Ibi bitaramo byatangiye tariki ya 5 Nyakanga mu Karere ka Kirehe, bikomereza tariki ya 11 Nyakanga muri Burera, tariki ya 12 Nyakanga 2025 bigera i Muhanga.
Ibi bitaramo byitabirwa n’ibihumbi by’abakunzi b’umuziki wengetse ndetse urimo ubutumwa bwubaka Igihugu bizakomereza mu Karere ka Huye tariki ya 18 Nyakanga 2025.
Senderi uzwi cyane mu ndirimbo z’amakipe y’umupira w’amaguru zirimo iza APR FC na Rayon Sports ndetse n’izijyanye no gukunda Igihugu, yagiye agaragara mu bikorwa bitandukanye birimo ibitaramo bitegura ibikorwa byo kwiyamamaza kwa Perezida Kagame mu matora ya 2010, 2017 na 2024, yahatanye muri Guma Guma Superstar [yitabiriye inshuro 3 zikurikiranya] ndetse yanaherekeje Amavubi mu Gikombe cy’Isi cy’abatarengeje imyaka 17 cyabereye muri Mexico mu 2010.
Yatwaye ibihembo bitatu bya Salax Awards mu Cyiciro cya Best Afrobeat Artist ndetse n’ibihembo bitatu bya Karisimbi Awards nk’umuhanzi ukunzwe cyane n’abaturage.
Izina rye rizwi cyane mu bihangano birimo “Ibidakwiriye ndabivuga”, “Nta Cash”, “FPR yahozeho” na “Iyo Twicaranye” zakunze kwifashishwa mu bukangurambaga bwa Leta bwo kwegerana n’abaturage.
Ibitaramo bya Senderi bizenguruka igihugu birakomeza.
