Tombola y’uko amakipe azahura mu Irushanwa rya CECAFA Kagame Cup 2025 yasize APR FC ihagarariye u Rwanda iri mu Itsinda B hamwe na Bumamuru yo mu Burundi, Mlandege yo muri Zanzibar na NEC FC yaserukiye Uganda.
CECAFA Kagame Cup igiye gukinwa ku nshuro ya 45, izabera mu Mujyi wa Dar es Salaam, kuva ku wa 2 Nzeri kugeza ku wa 15 Nzeri 2025.
Amakipe 12 yo mu Karere ni yo azaryitabira, ahataniye kwishakamo imwe izaryegukana isimbura Red Arrows yo muri Zambia ifite igikombe cya 2024, yatwaye itsinze APR FC.
APR FC yatomboye neza kuko ihabwa amahirwe mu itsinda ryayo ririmo amakipe nka Bumamuru, Mlandege na NEC FC.
Ikipe ya NEC FC izahagararira Uganda muri CAF Confederation Cup yafashe umwanya wa Vipers SC mu gihe Bumamuru FC yasimbuye Flambeau du Centre y’iwabo mu Burundi.
Ni ubwa mbere APR FC izaba icakiranye n’aya makipe mu gihe Mlandege yo muri Zanzibar baherukaga guhurira muri Mapinduzi Cup aho yabatsinze kuri penaliti nyuma yo kunganya 0-0.
Imikino ya CECAFA Kagame Cup 2025 izakinirwa ku bibuga bitatu birimo icya Azam Complex, KMC Stadium na Major General Isamuhyo Stadium.
APR FC izerekeza muri Tanzania ku wa Gatandatu, tariki 30 Kanama 2025. Ni yo kipe rukumbi muri 12 zizakina CECAFA Kagame Cup ifite amateka yo kuyegukana.
Ikipe y’Ingabo yatwaye CECAFA Kagame Cup eshatu mu myaka itandukanye, irimo 2004 na 2007 ndetse n’iheruka yo mu 2010 yatwaye itsinze Saint George yo muri Ethiopia.
Simba SC yo muri Tanzania na AFC Leopards yo muri Kenya ni zo zimaze kwegukana CECAFA Kagame Cup inshuro nyinshi, aho zaritwaye 6, mu gihe Yanga SC na Tusker FC zaryegukanye inshuro eshanu kuri buri yose.
Amatsinda ya CECAFA Kagame Cup 2025:
•Itsinda A: Singida Black Stars (Tanzania), Garde Cotes FC (Djibouti), Ethiopia Coffee (Ethiopia) na Kenya Police (Kenya).
•Itsinda B: APR FC (Rwanda), NEC FC (Uganda), Bumamuru FC (Burundi) na Mlandege (Zanzibar).
•Itsinda C: Al Hilal (Sudani), Kator FC (Sudani y’Epfo), Mogadishu City Club (Somalia) na Al Ahli Madani (Sudani).
