U Rwanda rwagaragarije abacuruzi n’abashoramari 200 bo mu Bushinwa amahirwe ari mu kuhashora imari, runashimangira ko igihugu cyashyizeho uburyo bworohereza abanyamahanga bashaka gutangiza imishinga itandukanye.
Iki gikorwa cyabereye mu Mujyi wa Shanghai cyateguwe n’Urwego rw’Igihugu rushinzwe Iterambere (RDB), ku bufatanye na Ambasade y’u Rwanda mu Bushinwa, aho cyahujwe n’imurikagurisha ry’ubucuruzi mpuzamahanga ryiswe China International Import Expo (CIE), ryabaye ku nshuro ya cyenda kuva tariki ya 5 kugeza ku ya 10 Ugushyingo 2026.
Umuyobozi Mukuru Wungirije wa RDB, Juliana Muganza, yasabye abashoramari b’Abashinwa kureba amahirwe ari mu Rwanda no kuyabyaza umusaruro, agaragaza ko igihugu cyashyizeho uburyo bworohereza abashoramari.
Ambasaderi w’u Rwanda mu Bushinwa, Emmanuel Karenzi Karake, yagaragaje ko umubano mwiza w’ibihugu byombi ari umusingi wo kurushaho kwagura ubufatanye mu bukungu, anashimangira ko Ambasade izakomeza korohereza abashoramari bashaka gukorana n’u Rwanda.
Uretse iki gikorwa, intumwa za RDB na Ambasade y’u Rwanda mu Bushinwa zatemberejwe ibikorwa by’Abanyarwanda bitabiriye iri murikagurisha, hagamijwe kureba uko ibicuruzwa bikorerwa mu Rwanda byarushaho kwinjira ku isoko ry’u Bushinwa.
Mu bicuruzwa byamuritswe harimo ikawa, icyayi, urusenda, amavuta ya avoka n’ibikorwa by’ubuhanzi n’ubugeni, ndetse n’amahirwe y’ishoramari ari mu nzego zirimo; ubucuruzi, ishoramari n’ubukerarugendo.
Abasuye aho u Rwanda rwamurikiye ibicuruzwa bataramiwe n’itsinda Ishyo, rigizwe n’Abanyarwanda bakora ibikorwa ndangamuco batuye mu Bushinwa.
Kwamamaza ibicuruzwa bikorerwa mu Rwanda no gukurura ishoramari riturutse mu Bushinwa biri mu ntego z’iki gikorwa, hagamijwe guteza imbere ubufatanye bw’ubucuruzi buzagirira inyungu ibihugu byombi.
U Rwanda n’ubushinwa bifitanye imikoranire ihamye cyane cyane mu bucuruzi aho mu 2026 u Rwanda rwohereje mu Bushinwa ibicuruzwa bifite agaciro ka miliyoni 116$, bingana n’izamuka rya 89% ugereranyije n’umwaka wari wabanje wa 2024.
Imibare y’Ikigo cy’Igihugu cy’Ibarurishamibare NISR, igaragaza ko agaciro k’ibyo u Rwanda rwohereje mu Bushinwa mu mezi atandatu ya mbere ya 2026 kageze kuri miliyoni 236.99$, karenze amafaranga yose u Rwanda rwinjije mu Bushinwa mu mwaka wose wa 2025.
Ni mu gihe kandi mu myaka itanu ishize kuva mu 2021 kugeza 2025, u Rwanda rwakiriye ba mukerarugendo b’Abashinwa bagera ku 14.000 bavuye kuri 3.000 bingana n’izamuka rya 367%.
