Moïse Nyarugabo wahoze ari Senateri muri Repubulika Iharanira Demokarasi ya Congo, mu burakari bwinshi yasabye guverinoma yiki gihugu n’iyu Burundi ashinja kugaba ibitero ku Banyamulenge muri Kivu y’amajyepfo, kubihagarika, bitaba ibyo zikavugutirwa umuti.
Ni mu kiganiro n’itangazamakuru, cyabereye mu mujyi wa Goma aho yagaragaye aburira Leta y’i Kinshasa n’iyu Burundi guhagarika intambara bashoye ku Banyamulenge batuye i Mulenge.
Muri ubwo butumwa yagize ati: “Uyu munsi ndasaba guverinoma ya Kinshasa guhita ihagarika ibitero igaba ku Banyamulenge, kandi ibaye itabihagaritse bishobora kuzayigaruka nayo bidatinze.”
Yanaboneyeho no gusaba leta yu Burundi ifatanya niya Kinshasa kugaba biriya bitero kuri benewabo (Abanyamulenge), kwirinda gusenya amateka yubatse hagati y’impande zombi (Abarundi n’abanyamulenge), bukareka kwivanga no kumena amaraso y’abaturage b’inzirakarengane.
Ati: “U Burundi ni buhagarike kumena amaraso y’abaturage b’inzirakarengane, bitazabutobera amateka.”
Moïse Nyarugabo kuri ubu ari mu bice bigenzurwa n’ihuriro rya AFC/M23/MRDP-Twirwaneho, yahageze mu ntangiriro z’ukwezi kwa kane uyu mwaka. Bivugwa ko yahagereye igihe kimwe na Joseph Kabila wayoboye RDC imyaka 18.
