Umunyamabanga wa Leta muri Minisiteri y’Ibikorwaremezo, Olivier Kabera yatangije inama yihariye yateguwe n’Abagize Ihuriro Nyafurika igamije kureba uko umugabane wa Afurika wakwihaza mu ngufu z’Amashanyarazi.
Ni inama iri kubera muri Kigali Convection Center, guhera tariki 4-6 Ugushyingo 2024, ikaba ifite insanganyamatsiko igira iti” Twizera ko ingufu atari ikintu ukwacyo, ahubwo ni umusemburo w’iterambere, ihangwa ry’udushya n’uburinganire bwa Sosiyete.”
Iyi nama yitabiriwe n’abayobozi b’ibigo bitunganya ingufu, abakozi bo mu nzego za leta, abikorera ndetse n’abandi batandukanye hagamijwe kuganira ku ngamba zo guteza imbere ingufu muri Afurika.
Umunyamabanga wa Leta muri Minisiteri y’Ibikorwaremezo mu Rwanda, Olivier Kabera atangiza iyi nama yavuze ko ije mu gihe kiza.
Ati” Iyi nama ije igihe kiza kandi ikenewe. Nka Afurika imwe mu mbogamizi dufite ni ukutabona ingufu zirambye zijyanye n’uburyo abaturage biyongera.”
U Rwanda rugeze ku kigero cya 80% mu kugeza amashanyarazi ku baturage, ariko mu cyiciro cya kabiri cya Gahunda y’Igihugu yo kwihutisha Iterambere (NST2), biteganyijwe ko ruzagera ku gipimo cya 100%.
Gusa nubwo iyi mibare igaragaza ko biri ku kigero cyiza, muri Afurika hari abaturage basaga miliyoni 600 badafite umuriro w’amashanyarazi, bigaragaza ko hakiri ibyo gukora.
Iyi nama izatanga amahirwe ku bakora mu by’amashanyarazi, kugira ngo baganire ku bisubizo bishya, barebe uko bashobora guhuza imbaraga mu rwego rwo kubaka umugabane w’Afurika wihaza mu ngufu z’amashanyarazi.
