U Rwanda n’u Burusiya byasinyanye amasezerano akuriraho Visa abafite pasiporo z’abadipolomate n’iza serivisi, mu rwego rwo guteza imbere ubufatanye hagati y’ibihugu byombi.
Aya masezerano yashyizweho umukono kuri uyu wa gatandatu Tariki 9 ugushyingo 2024, na Minisitiri w’Ububanyi n’Amahanga w’u Rwanda, Olivier Nduhungirehe na mugenzi we w’u Burusiya, Sergei Lavrov.
Iki gikorwa cyabereye i Sochi mu Burusiya, ahamaze kubera inama ya mbere yahuje Abaminisitiri b’Ububanyi n’Amahanga ba Afurika yiga ku bufatanye hagati y’u Burusiya na Afurika.
Amasezerano u Rwanda rwasinyanye n’u Burusiya yemeza ko abagize guverinoma n’abandi bafite imirimo ya serivisi mu nzego z’ubutegetsi z’ibihugu byombi bashobora gutembera mu bihugu byombi bafite pasiporo gusa.
Ibi bizafasha koroshya ibikorwa by’ubufatanye mu nzego zitandukanye zirimo ubukungu, uburezi, ubuvuzi, ndetse n’ibikorwa bya dipolomasi.
Minisitiri Lavrov yashimye umubano igihugu cye gifitanye n’u Rwanda, avuga ko ubu bufatanye bugamije guhuza iterambere mu ibihugu byombi.
Minisitiri Nduhungirehe yashimye iyi ntambwe ikomeye mu kurushaho gufungura amarembo y’ubufatanye n’ubushake bwo gukomeza guhuza gahunda z’ubukungu n’imibereho myiza y’abaturage bo mu bihugu byombi.
