U Rwanda rwasubukuye ubucukuzi bw’amabuye y’agaciro ya Beryllium, nyuma y’uko bwari bwarafunzwe muri Kanama 2024, hagamijwe gukurikirana neza uburyo iki gikorwa cyagendaga.
Ni itangazo Urwego rw’Igihugu rushinzwe Mine, Peteroli, n’Umuriro (RMB), cyashyize hanze hifashishijwe urubuga rwa X, kuri uyu wa mbere, tariki ya 25 Ugushyingo 2024.
Ubu bucuruzi bwari bwarahagaritswe tariki ya 8 Kanama 2024, hagamijwe gukurikirana uburyo amabuye yacukurwagamo ndetse n’ubuziranenge bw’ubu bucuruzi, bakurikiza amategeko.
RMB yatangaje ko habanje gukorwa igenzura rigamije kurinda ubucuruzi butemewe n’umutekano w’imbere mu gihugu, ndetse isaba ko abohereza aya mabuye y’agaciro mu mahanga bose basabwa kubahiriza amabwiriza, no guhabwa icyemezo cy’ubuziranenge.
Umuyobozi Mukuru wa RMB, Kamanzi Francis yavuze ko abacuruza amabuye ya Beryllium atujuje ibisabwa cyangwa mu buryo budakurikiza amategeko, bazajya bafatirwa ibihano bikomeye.
U Rwanda rwashyizeho ingamba zirebana no gucukura amabuye y’agaciro mu buryo bwemewe n’amategeko, by’umwihariko amabuye ya Beryllium akoreshwa mu gukora intwaro kirimbuzi.
Abakora ubu bucukuzi basabwa gukorana n’ikigo kibishinzwe cya RMB kugirango barusheho kumenya amategeko abigenga mu rwego rwo kwirinda amakosa n’ibihano.
