Minisitiri w’Intebe, Dr Edouard Ngirente, yahaye ipeti aba Ofisiye bato 635, abibutsa ko inyigisho bamaze igihe bahabwa ari ingirakamaro mu kazi ka polisi ko gucunga umutekano, wo bukungu u Rwanda rushingiyeho mu myaka 30 ishize.
Kuri uyu wa gatanu, tariki ya 13 Ukuboza 2024, icyiciro cya 13 cy’aba Ofisiye bato 635, basoje amasomo bari bamazemo umwaka n’amezi atatu. Uyu muhango wabereye Mu Ishuri ry’Amahugurwa rya Polisi riherereye i Gishari mu Karere ka Rwamagana.
Abayobozi batandukanye bawitabiriye barimo Minisitiri w’Intebe, Dr Edouard Ngirente, Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel; Minisitiri w’Ingabo, Juvenal Marizamunda; Umugaba Mukuru w’Ingabo z’u Rwanda, Gen Mubarakh Muganga n’Umuyobozi Mukuru wa Polisi y’Igihugu, IGP Felix Namuhoranye.
Minisitiri Ngirente yashimiye abasoje amahugurwa, ababwira ko amasomo bahawe ari ingirakamaro mu kazi kabo ko gucunga umutekano haba mu gihugu imbere no mu mahanga, aho boherezwa mu butumwa bw’amahoro, agaragaza ko umutekano ariryo shingiro ry’ubukungu bw’u Rwanda mu myaka 30 ishize.
Ati” Mu myaka 30 ishize, u Rwanda rwakomeje kuba Igihugu gitekanye ndetse kinafite ubukungu buzamuka buri mwaka. Ayo majyambere n’umutekano dufite inshingano zo gukomeza kubibungabunga no kubirinda.”
Umuyobozi w’Ishuri ry’Amahugurwa rya Polisi, CP Robert Niyonshuti yavuze ko aba Ofisiye bize amasomo agamije kubungura ubumenyi, ubushobozi, imyitwarire n’imikorere ya kinyamwuga ku rwego bariho.
Aba Ofisiye basoje amahugurwa barimo abagabo 527 n’abagore 108, bazakomereza akazi muri Polisi y’u Rwanda, abandi mu Rwego rw’Igihugu rw’Ubugenzacyaha, RIB, Urwego rw’Igihugu rushinzwe Umutekano n’Iperereza (NISS), n’Urwego rw’u Rwanda rushinzwe Igorora, RCS.
