Ku mugoroba wo ku wa gatandatu, tariki ya 28 Ukuboza 2024, mu nyubako ya BK Arena habereye igitaramo cyahuriyemo abahanzi bakomeye bo mu gihugu cya Nigeria aribo Ruger na Victony, nyamara umubare w’abafana wari hasi ukurikije ibindi bitaramo bibera mu Rwanda byabaturutse muri kiriya gihugu gifatwa nk’igicumbi cya muzika.
Ni igitaramo cyari gitegerazanyijwe amatsiko kuko Ruger ari mu bahanzi bafite izina rikomeye mu muziki wo muri Afurika, ndetse na Victony uri mubazamutse neza bakunzwe na benshi mu ndirimbo nka ‘Soweto’, ‘Kolomental’ n’izindi.
Nk’uko bikunze kugenda iyo hari igitaramo gitegerejwe muri BK Arena, inzira ziherekeza ziba zuzuye abantu ari uruvunga nzoka. Gusa mu ijoro ryakeye siko byari bimeze kuko wabonaga ku mu marembo hari ubwisanzure rwose ntawubyigana n’undi bisobanura neza ko abantu bari bake.
Iki gitaramo cyahawe izina rya ‘ReVV Up Experience’ cyatinze gutangira ku masaha yari yagenwe bituma abafana bake bari muri BK Arena nabo batangira kurambirwa. Gusa nubwo byari bimeze bityo abavanga umuziki n’umushyushyarugamba Zuba bo bakomeje gukora iyo bwabaga.
Ku isaha ya 9:50 z’ijoro nibwo umuhanzi wa mbere yageze ku rubyiniro, ariwe Bruce the 1st akurikirwa na Bushali warufite n’ikindi gitaramo kimutegereje muri Kigali Universe, aza gukurikirwa na Ross Kana twavuga ko yongeye gukangura abafana wabonaga ko batangiye kwibaza ibyo barimo.
Kubasanzwe bitabira ibitaramo bibera muri BK Arena bazi neza ko umuhanzi w’imena agera ku rubyiniro nyuma, bitandukanye no mw’ijoro ryakeye, aho abafana bagiye kubona babona Ruger asesekaye ku rubyiniro mbere y’igihe yari ategerejwe, bivugwa ko uyu muhanzi yari afite umwanya muto mu gihugu yashakaga gukomeza iwabo muri Nigeria.
Ruger yaririmbye indirimbo ze zakunzwe ndetse zizwi n’abafana zirimo ‘Toma Toma’, ‘Bae Bae’, ‘Snapchat’, ‘Asiwaju’ n’izindi. Ubwo yari ku rubyiniro, uyu muhanzi yagaragaje ko yashimye ubwiza bw’Abanyarwandakazi, ndetse ntiyatinze yahise agera mu bafana yihitiramo inkumi yajyanye ku rubyiniro arayiganiriza biratinda.
Uyu muhanzi wavuye ku rubyiniro anyuze abafana nyuma yo kubanyurira muri nyinshi mu ndirimbo ze zakunzwe, yakurikiwe n’umuhanzi Davis D, atarama umwanya muto ari nako abafana bagenda bagabanuka.
Victony yageze ku rubyiniro yakirwa neza n’abanya-Kigali dore ko aribwo abenshi bari bamukubise ijisho, kuko ari ubwa mbere ataramiye mu Rwanda. Uyu muhanzi yahereye ku ndirimbo zitazwi neza n’abafana ariko aza gusoreza kuzo bakunze zirimo ‘Babylon’, ‘Holy Ghost’, ‘Soweto’ n’izindi.
