CP Theos Badege wabaye Umuvugizi wa Polisi y’u Rwanda, yagizwe Komiseri Mukuru Wungirije w’Urwego rw’u Rwanda rushinzwe Igorora (RCS).
Ni impinduka zatangarijwe mu myanzuro y’Inama y’Abaminisitiri yateranye kuri uyu wa Kane, tariki ya 2 Mata 2026.
CP Theos Badege yakoze imirimo itandukanye mu buyobozi bwa Polisi y’u Rwanda aho yabaye Umuvugizi wa Polisi y’u Rwanda inshuro zirenga imwe.
Mu mwaka wa 2018, CP Badege yasimbuwe ku mwanya w’Ubuvugizi bwa Polisi na CP John Bosco Kabera.
Mbere yo kuba Umuvugizi, Badege yigeze no kuyobora ishami rishinzwe ubugenzacyaha (CID) muri Polisi y’u Rwanda, mbere y’uko rihinduka Urwego rw’Igihugu rushinzwe Ubugenzacyaha (RIB).
CP Badege yazamuwe ku ipeti rya Commissioner of Police (CP) muri Mutarama 2018, avuye ku rya Assistant Commissioner of Police (ACP).
Nyuma yo kuva ku mwanya w’Ubuvugizi, yakomeje guhabwa izindi nshingano zikomeye zirimo no guhagararira u Rwanda mu butumwa bw’amahoro bw’Umuryango w’Abibumbye.
Mbere yo kugirwa Komiseri Mukuru Wungirije wa RCS, Badege yari asigaye akora mu Bunyamabanga Bukuru bwa Polisi Mpuzamahanga, Interpol i Lyon mu Bufaransa.
