Umuhanzikazi Bukuru Christine uzwi ku mazina ya Boukuru, ni we Munyarwanda rukumbi uhatanye mu bihembo bya ‘Prix Découvertes RFI 2025’.
Ibi bihembo bitegurwa na Radio Mpuzamahanga y’Abafaransa, RFI, ku bufatanye n’abantu bari mu myidagaduro ku rwego mpuzamahanga.
Abatoranyijwe berekana umwihariko n’ubuhanga mu miririmbire yabo by’umwihariko imbonankubone, hakarebwa uburyo ibihangano byabo bizwi hanze y’igihugu, n’uko bakurura abafana.
Prix Découvertes RFI 2025 izatangwa tariki ya 18 Gashyantare 2025, abahanzi bazaba bahatana ni 10, uhiga abandi azegukana umwanya wa mbere.
Muri aba bahanzi icumi harimo umuhanzikazi Boukuru ukomoka mu Rwanda, Joyce Babatunde wo muri Cameroun, Gregory Laforest wo muri Haiti, Dina M wo muri Madagascar, Jenny Paria na Suintement bo muri RDC, Queen Rima na Straiker bo muri Guinée, Sahad wo muri Sénégal na Yewhe Yeton wo muri Benin.
Boukuru uhatanye muri ibi bihembo yatangiye kuririmba mu 2018, yanyuze mu maboko menshi arimo na ArtRwanda-Ubuhanzi ndetse muri Nzeri 2024, yamuritse album igizwe n’indirimbo 10 yise ‘Gikundiro’ abifashijwemo n’inzu ifasha abahanzi ya Enric Sifa.
Umuhanzi wegukanye Prix Découvertes, ahembwa amayero ibihumbi icumi angana na miliyoni 14 Frw, ndetse agafashwa gukora ibitaramo bizenguruka Afurika n’igitaramo nyamukuru kibera i Paris mu Bufaransa.
Ibihembo bya Prix Découvertes biheruka gutaha mu Rwanda mu 2018, ubwo yegukanwaga na Yvan Buravan, witabye Imana mu 2022.
