U Rwanda rugiye kwakira ku nshuro ya 6 Inama Nyafurika ihuza urubyiruko, abashoramari, abafata ibyemezo n’abafatanyabikorwa mu iterambere, izwi nka YouthConnekt Africa Summit.
Iyi nama iteganyijwe kubera i Kigali, kuva tariki ya 25 – 27 Ugushyingo 2026.
Guverinoma y’u Rwanda yasinyanye amasezerano n’abafatanyabikorwa ba YouthConnekt Africa, barimo Ishami ry’Umuryango w’Abibumbye ritsura Amajyambere (UNDP), yo kwakira iyi nama izaba ihurije hamwe ibihumbi by’urubyiruko n’abayobozi baturutse hirya no hino ku Mugabane wa Afurika.
Aya masezerano yasinywe ku mugoroba wo ku wa Gatatu, aho u Rwanda rwari ruhagarariwe na Minisitiri w’Urubyiruko n’Iterambere ry’Ubuhanzi, Dr Utumatwishima Abdallah.
YouthConnekt Africa Summit 2026 izaba ifite insanganyamatsiko igaruka ku kwagura ahazaza ha Afurika hifashishijwe uruhare rw’urubyiruko, hagamijwe guteza imbere udushya, kwihangira imirimo no gushimangira uruhare rw’abakiri bato mu iterambere ry’umugabane.
YouthConnekt Africa ni gahunda yatangijwe na Guverinoma y’u Rwanda ku bufatanye na UNDP mu mwaka wa 2012, hagamijwe gufasha urubyiruko kubona amahirwe yo kwiteza imbere no kugira uruhare mu iterambere ry’igihugu.
Nyuma yo gutanga umusaruro mu Rwanda, mu mwaka wa 2017 yaraguwe iba gahunda ihuriweho n’ibihugu bya Afurika binyuze muri YouthConnekt Africa Hub.
Uyu munsi, gahunda ya YouthConnekt Africa imaze kugera mu bihugu 32 bya Afurika, aho ifasha urubyiruko kubona amahirwe y’akazi, amahugurwa n’inkunga zo guteza imbere imishinga yabo.
Imibare igaragaza ko binyuze muri iyi gahunda hamaze guhangwa imirimo irenga miliyoni 4 mu bihugu biyigize, mu gihe urubyiruko rusaga 60.000 rwahawe amahugurwa n’inkunga zo guteza imbere imishinga y’ubucuruzi buto n’ubuciriritse.
Iyi gahunda kandi yafashije urubyiruko rurenga 5.000 gusobanukirwa no gukoresha amahirwe atangwa n’Isoko Rusange rya Afurika ryo Guhahirana (AfCFTA), ndetse inatanga ibihembo n’inkunga ku mishinga y’urubyiruko binyuze mu marushanwa ya YouthConnekt Awards.
Bamwe mu rubyiruko batsinze ayo marushanwa bahawe inkunga y’amafaranga kugira ngo bateze imbere imishinga yabo, binyuze mu bafatanyabikorwa nka UNDP bakomeje gushyigikira ibikorwa bigamije kongerera urubyiruko ubushobozi bwo kwihangira imirimo.
Mu bijyanye n’ibihembo bya YouthConnekt Awards, UNDP n’abandi bafatanyabikorwa bahemba abatsinze mu byiciro bitandukanye, aho uwa mbere ahabwa miliyoni 15 Frw, uwa kabiri agahabwa miliyoni 12 Frw, naho uwa gatatu agahabwa miliyoni 8 Frw.
Mu byiciro byihariye birimo abagore n’abantu bafite ubumuga, uwa mbere muri buri cyiciro ahabwa miliyoni 5 Frw.
Ni mu gihe, urubyiruko n’abanyeshuri bose bageze ku cyiciro cya nyuma batabashije kuza mu batatu ba mbere bahabwa inkunga ingana na miliyoni 1 Frw buri wese, igamije kubafasha gukomeza guteza imbere imishinga yabo.
