Ikipe ya Gisagara VC yatangaje ko yahagaritse abakinnyi bayo babiri Muvara Ronard na Ngaboyintwari Cedric, bazira imyitwarire mibi yabaranze mu irushanwa rya volleyball ryo Kwibuka Abazize Jenoside yakorewe Abatutsi mu 1994, Genocide Memorial Tournament (GMT) 2026.
Mu itangazo Gisagara VC yashyize ahagaragara ku mugoroba wo kuri uyu wa Gatandatu, tariki 21 Kamena 2026.
Muvara Ronard ukina hagati (Middle blocker) na Ngaboyintwari Cedric ukina asaranganya imipira (Setter), bahagaritswe igihe kigera ku minsi 90 (amezi abiri) badakina.
Gisagara VC yongeyeho ko itazigera yihanganira na gato abarangwa n’imyitwarire idahwitswe.
Muvara yageze muri Gisagara VC muri uyu mwaka w’imikino nyuma yo kumara imyaka ibiri mu ikipe ya REG VC, ndetse akaba yaragiye muri REG VC n’ubundi avuye muri Gisagara VC, ni mu gihe Ngaboyintwari yageze muri Gisagara VC avuye muri APR VC.
Muvara ni umwe mu bakinnyi batwaranye umudari w’umwanya wa gatatu na Gisagara VC muri 2022 mu mikino Nyafurika ihuza amakipe yabaye aya mbere iwayo, CAVB Men’s Club Championship, yari yabereye muri Tunisia.
Ibi bihano by’aba bakinnyi bije nyuma y’uko Gisagara VC ubu iri mu maboko y’umutoza mushya Kwizera Pierre Marchal wagizwe umutoza w’iyi kipe nyuma y’uko Yakan Guma Lawrence yeguye kuri izi nshingano.
Yakan yagiye kwegura ikipe ya Gisagara VC iri kugira umusaruro mubi, bitandukanye n’uko yari yaratangiye umwaka w’imikino yitwara.
Iyi kipe y’Akarere ka Gisagara yari yatangiye umwaka w’imikino yitwara neza dore ko yatwaye igikombe cya BK Arena Volleyball Tournament cyari gikinwe bwa mbere mu Ukuboza 2025, ndetse yarangije imikino isanzwe ya Shampiyona iyoboye urutonde.
Nyuma y’aha ntabwo Gisagara VC yakomeje kwitwara neza kuko mu mikino ya kamarampaka yahise isezererwa muri 1/2 na Police VC yari yabaye iya kane muri Shampiyona itsinzwe imikino 3-0 ndetse no mu guhatanira umwanya wa gatatu yongeye gutsindwa na Kepler VC imikino 3-0 n’ubundi.
Hagati aho na mbere y’uko imikino ya kamarampaka itangira, Gisagara VC yari yatakaje igikombe cy’Intwari nyuma yo gusezererwa na Police VC muri 1/2 itsinzwe amaseti 3-0 ndetse n’igikombe cyo kwibuka Padiri Kayumba nyuma yo gutsindwa na REG VC ku mukino wa nyuma amaseti 3-1.
Gisagara VC yakomeje kutitwara neza mu mikino y’irushanwa ryo Kwibuka Rutsindura Alphonse aho yasezerewe muri 1/2 na REG VC itarifite benshi mu bakinnyi bayo basanzwe babanzamo barimo Nicolas Matui, Sam Engwau, Twagirayezu Emmy, Rwigema Simon na Gisubizo Merci.
Umusaruro nkene wakomeje no muri iri rushanwa rya GMT 2026 aho Gisagara VC yasezerewe murj 1/4 na Police VC.
