Umukinnyi Muvara Ronard ukinira Gisagara VC yanditse ibaruwa isaba imbabazi nyuma yo guhagarikwa n’ikipe ye igihe kigera ku mezi abiri adakina azira imyitwarire mibi.
Kuri iki Cyumweru tariki 21 Kamena 2026 nibwo Muvara ukina hagati (Middle Blocker) yandikiye ubuyobozi bwa Gisagara abusaba imbabazi, yemera ko yakoze amakosa ndetse asaba imbabazi ko bitazongera.
Ku wa Gatandatu tariki 20 Kamena 2026 nibwo ikipe ya Gisagara VC yari yasohoye itangazo rivuga ko abakinnyi bayo babiri; Muvara Ronard na Ngaboyintwari Cedric (Setter) bahagaritswe kubera imyitwarire mibi.
Aba bombi bahagaritswe nyuma yo kwanga gukina umukino wa 1/4 wo mu irushanwa ryo kwibuka Abazize Jenoside mu 2026, Genocide Memorial Tournament 2026, Gisagara yagombaga guhuramo na Police VC bituma iyi kipe yo mu Ntara y’Amajyepfo iterwa mpaga.
Amakuru avuga ko aba bakinnyi bombi bahagaritswe kuko bari mu bagumuye abandi ntibemere gukina uyu mukino kubera ko bamaze amezi 4 badahembwa.
