Ikipe ya Kenya Ports Authority WVC (KPC) mu bagore na Kepler VC mu bagabo zegukanye irushanwa ngarukamwaka rya Volleyball ryo Kwibuka abazize Jenoside yakorewe Abatutsi mu 1994, Genocide Memorial Tournament 2026 (GMT).
Iri rushanwa ryasojwe kuri iki Cyumweru tariki 21 Kamena 2026, nyuma y’iminsi itatu ryari rimaze rikinwa.
Mu cyiciro cy’abagore, KPC yo muri Kenya yatsinze APR WVC yo mu Rwanda amaseti 3-0 (25-17, 25-20, 25-15) ku mukino wa nyuma biyiha kwegukana igikombe cyari gifitwe na Police WVC.
Mu cyiciro cy’abagabo, igikombe cya GMT cy’uyu mwaka cyegukanwe na Kepler VC itsinze APR VC ku mukino wa nyuma amaseti 3-0 (25-22, 28-26, 25-21).
Police VC yegukanye umwanya wa gatatu mu bagabo nyuma yo gutsinda REG VC amaseti 3-1 (25-22, 25-25-17, 20-25, 29-27), naho mu bagore, umwanya wa gatatu wegukanwe na Police WVC yatsinze Kepler WVC amaseti 3-2 (25-21, 23-25, 12-25, 25-13, 15-11).
Abakinnyi bahembwe nk’abahize abandi mu bagabo ni Hamid Ibrahim (APR VC) wahembwe nk’uwaserivye neza (Best server), Kageruka Cedric (Kepler VC) wahembwe nk’uwakoze resebusiyo neza (Best Receiver), Marino Oboke (Kepler VC) wahembwe nk’usaranganya imipira neza (Best Setter), na Dusenge Wicklif (Kepler VC) wahembwe nk’uwatatse neza kurusha abandi (Best Attacker).
Abandi bahembwe ni Kanamugire Prince (APR VC) wahembwe nk’uwabolotse neza (Best blocker), Niyigena Jules wahembwe nka libero mwiza w’irushanwa (Best libero) ndetse na Dusenge Wicklif (Kepler VC) wahembwe nk’umukinnyi mwiza w’irushanwa (MVP).
Mu bagore, Marian Sokoiyo (KPC WVC) yahembwe nk’umukinnyi mwiza w’irushanwa (MVP), Binta Bah Fatoumata (Kepler WVC) ahembwa nk’uwaserivye neza (Best server), Mukandayisenga Benitha (APR WVC) ahembwa nk’uwakoze resebusiyo neza (Best Receiver), Emmaculate Nekesa (KPC WVC) ahembwa nk’uwasaranganyije imipira neza (Best Setter), Veronica Adhiambo (KPC WVC) ahembwa nk’uwatatse neza kurusha abandi (Best Attacker), Marian Sokoiyo (KPC WVC) ahembwa nk’uwabolotse neza (Best blocker), naho Sharon Arusei (KPC WVC) ahembwa nka libero mwiza w’irushanwa.
