Umuhanga mu gutunganya imiziki, Irasubiza Prince Moïse uzwi kw’izina rya Prince Kiiz, yasobanuye uburyo umuziki wamuhinduriye ubuzima. Agira inama urubyiruko yo kugira inzozi zagutse, ndetse bagatinyuka kwikorera bagendeye ku bushobozi bifitemo.
Prince Kiiz uvuga ko yize mu ishuri ry’umuziki riri mu karere Ka Muhanga, yinjiye muri uyu mwuga wo gutunganya imiziki bizwi nka “Production” mu mpera z’umwaka wa 2021, ndetse bikora nk’ibintu yakuze akunda kandi yize neza, nkuko yabigarutseho mu kiganiro yagiranye n’ikinyamakuru KURA.
Yakomeje asobanura ko yakuranye inzozi zo kuzakora umuziki ndetse n’ibindi biwerekeyeho, birimo gucuranga ‘Gitari na Piano’. Prince Kiiz ubuhanga bwe bwakunzwe n’abanyarwanda mu ndirimbo zirimo Funga Macho ya Bruce Melodie, My Type, Amanota na Confirm za Danny Nanone, n’izindi nyinshi zamushyize ku mwanya w’imbere mu bakora umuziki kinyamwuga.
Yakomeje avuga ko mu kazi kose hataburamo birantega n’ibicantege, gusa akomezwa n’urukundo rw’abafana be beza.
Prince Kiiz agira inama urubyiruko avuga ko rugomba kugira inzozi zagutse, kandi rugaharanira ko zigerwaho mu mbaraga rufite, ati “ Inama naha urubyiruko ni ukurota mu buryo bwagutse, kumenya guhangana n’imbogamizi aho kuzihunga, bakamenya ko nta wundi uzabakemurira ibibazo byabo”.
Yakomeje arushishikariza gutinyuka kwikorera bagendeye ku bushobozi bafite, ati” Inama ku bijyanye no kwikorera ni ugutinyuka bakabijyamo. Iyo utarabijyamo biba bigoye. Kwikorera no gukorera abandi harimo itandukaniro rinini cyane”.
