Minisitiri w’Uburinganire n’Iterambere ry’Umuryango, Uwimana Consolee, yatangaje ku mugaragaro Inyoborabiganiro igenewe abahugura kuri gahunda yo kwimakaza umuco wo kuganira mu muryango.
Yayitangarije mu ‘Ihuriro ry’Urubyiruko’ ryateguwe na Imbuto Foundation ryibanze ku “Kwihutisha ibikorwa byo gukumira no kurandura inda ziterwa abangavu”.
Iri huriro ryitabirwe n’abiganjemo urubyiruko barenga 2000, ryabereye muri Kigali Convention Center, kuri uyu wa Gatanu, tariki 26 Kamena 2026.
Minisitiri Uwimana uri mu bayobozi baryitabiriye yatanze ubutumwa ku miryango n’urubyiruko, bwagarutse ku kutihanganira ihohoterwa rikorerwa abana, hirindwa inda ziterwa abangavu kuko ribangamira ubuzima bwabo n’abo babyara.
Yaboneyeho umwanya wo kumurika inyoborabiganiro izifashishwa mu kwigisha ubuzima bw’imyororokere, ashimangira ko ari bumwe mu buryo buzafasha ababyeyi kuganiriza abana ku ngingo z’ingenzi zafasha gukumira iki kibazo.
Yagize ati “Turifuza ko iba umuyoboro udufasha kwegera ababyeyi no kubatoza gukomeza kuganiriza abana kuko bifasha umwana kuva avutse kugeza ubwo azakugirira icyizere nk’umubyeyi.”
Iyi nyoborabiganiro yateguwe kugira ngo ifasheababyeyi n’abarezi kunoza uburyo baganira n’ingimbi n’abangavu muri rusange, by’umwihariko ku ngingo zirebana n’ubuzima bw’imyororokere.
Ni nyuma yo kubona uburyo ingingo y’ibiganiro n’ubusabane hagati y’ababyeyi n’abana ifite uruhare rukomeye mu iterambere ry’imiryango.
Ni muri urwo rwego, Umuryango Imbuto Foundation wiyemeje gukora ibishoboka ngo ufashe kugabanya icyuho cyari gihari, maze hategurwa ibitabo bibiri “Agaciro Kanjye” na “Tuganire Mwana Wanjye”.
Ibi bitabo byateguwe ngo bifashe abana n’ababyeyi kwiyungura ubumenyi n’ubushobozi mu buryo butandukanye, ariko buhuriye ku ntego imwe yo kwimakaza umuco w’ubusabane n’ibiganiro ku buzima bw’imyororokere mu bagize umuryango.
Ibi ni kimwe mu byitezweho gufasha mu guhangana n’ikibazo cy’inda ziterwa abangavu gikomeje gufata indi ntera. Imibare igaragaza ko mu Rwanda nibura abana 60 baterwa inda buri munsi, ni ukuvuga abarenga ibihumbi 23 buri mwaka.
