Ikipe ya Rayon Sports yatangaje ko yasinyishije Ibrahim Djingarey ukina mu kibuga hagati, avuye mu ikipe ya US Gendarmerie y’iwabo muri Niger.
Kuri iki Cyumweru, tariki 28 Kamena 2026, nibwo Rayon Sports yatangaje Djingarey w’imyaka 19 nk’umukinnyi wayo mushya.
Djingarey yabaye umukinnyi wa 10 Rayon Sports isinyishije kuva Shampiyona yarangira, aba umukinnyi wa 4 w’umunyamahanga uyisinyiye.
Ku isoko ry’abakinnyi, Rayon Sports ikomeje gusinyisha abakinnyi bakiri bato, nk’umushinga ifite wo kubakira ku bakinnyi bafite impano.
Kuri uyu wa mbere, tariki 29 Kamena 2026, nibwo biteganyijwe ko Rayon Sports itangira imyitozo ku kibuga cyo mu Nzove, yitegura umunsi w’Igikundiro uzaba tariki 18 Nyakanga 2026 ndetse n’irushanwa rya CECAFA Kagame Cup 2026.
