Minisitiri w’Ubumwe bw’Abanyarwanda n’Inshingano Mboneragihugu, Dr. Jean Damascène Bizimana, yasabye urubyiruko kurangwa n’indangagaciro ziboneye mu buzima bwabo bwa buri munsi.
Ni ubutumwa yatanze kuri uyu wa Mbere tariki 6 Nyakanga 2026, mu kiganiro yagejeje ku rubyiruko ruri mu Itorero Indangamirwa icyiciro cya 16, riri kubera mu Kigo cy’Amahugurwa cya Gisirikare cya Gabiro giherereye mu Karere ka Gatsibo.
Ni ikiganiro cyagarutse ku ruhare rw’Ubumwe bw’Abanyarwanda mu mateka y’u Rwanda, intandaro y’ingengabitekerezo ya Jenoside ndetse n’uko Jenoside yakorewe Abatutsi mu 1994 yashyizwe mu bikorwa.
Minisitiri Bizimana yasabye urubyiruko rwitabiriye Itorero Indangamirwa kurangwa n’indangagaciro ziboneye mu buzima bwabo bwa buri munsi.
Yagize ati “Nta cyitwa ingeso mbi kigomba kuranga Intore. Indangamirwa bivuze umuntu urangwa n’indangagaciro zituma buri wese yifuza kumera nka we.”
Yakomeje agira ati “Namwe rero icyo gisobanuro mucyumve, mukizirikane, mu gitondo ubyutse uvuge uti ‘Ngomba kuba icyitegererezo, haba mu mikorere, mu migirire no mu byo ngomba kwirinda’. Mubishyire mu buzima bwanyu bwa buri munsi, mubyimakaze na nyuma y’igihe muzaba muvuye hano mu Itorero.”
Itorero Indangamirwa ryitabiriwe n’urubyiruko rw’Abanyarwanda ruba mu mahanga, abanyeshuri biga mu mashuri mpuzamahanga akorera mu Rwanda, ndetse n’abarangije neza gahunda y’Igihugu y’urugerero.
Aya mahugurwa azamara ibyumweru bitandatu, yatangiye kuva tariki 1 Nyakanga kugeza ku wa 10 Kanama 2026, yitezweho gufasha uru rubyiruko kunguka inyigisho zitandukanye zigamije kubafasha kwimakaza indangagaciro na kirazira by’umuco nyarwanda no kurangwa n’umuco w’ubutore no kuba intagamburuzwa mu bibazo bahura na byo mu buzima.
Bazatozwa kandi kuba abaranga b’u Rwanda barushakira imbuto n’amaboko, no gusobanukirwa amateka y’u Rwanda, icyerekezo cy’Igihugu, banungurane ibitekerezo bigamije kumva uruhare rwabo mu iterambere ry’Igihugu no kurinda ibyagezweho.
