Umutoza w’umunyarwanda Nshimiyimana Canisius yagizwe umutoza mukuru w’ikipe ya Amagaju FC yo mu karere ka Nyamagabe nyuma yo gutandukana na Mukura VS&L.
Kuri uyu wa Kabiri tariki 7 Nyakanga 2026 nibwo ikipe ya Amagaju FC yo mu Ntara y’Amajyepfo yatangaje Nshimiyimana Canisius nk’umutoza wayo mushya asimbuye umubiligi Sghir Hammadi watozaga iyi kipe kuva muri Gashyantare 2026.
Nshimiyimana Canisius yari amaze umwaka umwe ari umutoza mukuru w’ikipe ya Mukura VS&L, wageze kuri uyu mwanya nyuma yo kumara imyaka 6 ari umutoza wungirije muri iyi kipe yo mu karere ka Huye.
Muri Shampiyona ishize, Mukura VS&L y’umutoza Nshimiyimana yarangirije ku mwanya wa 7 mu makipe 18 n’amanota 47, yatsinze imikino 12, inganya imikino 11, itsindwa imikino 11, yinjije ibitego 36, yinjizwa ibitego 38 bivuze ko yarangije Shampiyona ifite umwenda w’ibitego 2.
Ku rundi ruhande, ikipe ya Amagaju FC yarinze igera mu mikino ya nyuma ihatanira kudasubira mu Cyiciro cya kabiri kuko yasoreje Shampiyona ku mwanya wa 16 n’amanota 35, yatsinze imikino 9, inganya 8, itsindwa 17, yinjije ibitego 19, yinjizwa ibitego 38, bivuze ko yasoje ifite umwenda w’ibitego 19.
Nshimiyimana Canisius wanabaye umukinnyi w’umupira w’amaguru aho yakinaga nka myugariro, avuye muri Mukura VS&L nyuma y’imyaka 28 yari ayimazemo kuko yabanje kuyikinira kuva mu 1998 mbere yo gusezera ku mupira w’amaguru muri 2010 agahita atangira kuba umutoza w’amakipe y’abato kugeza abaye umutoza mukuru.
Uretse Nshimiyimana Canisius watangajwe nk’umutoza mushya wa Amagaju FC, iyi kipe yanatangaje ko yongeyereye amasezerano umutoza wungirije Hakizimana Jean Baptiste ndetse n’umutoza w’abazamu Maniraguha Nicolas.
