Ikipe ya APR BBC yatsinze ikipe ya RSSB Tigers amanota 84-82 mu mukino washyize akadomo ku mikino isanzwe ya Shampiyona (Regular Season), bituma aya makipe azongera agahura mu mikino ya 1/2 ya kamarampaka.
Mu ijoro ryo ku wa 24 Nyakanga 2026, nibwo muri Petit Stade i Remera habereye umukino wahuje APR BBC na RSSB Tigers iheruka gutwara igikombe cya BAL 2026.
Uyu mukino wagiye gukinwa aya makipe yombi yaramaze kubona itike yo kuzakina imikino ya kamarampaka, ariko wagombaga kugena uko amakipe 4 ya mbere agomba gukurikirana.
APR BBC yari yagaruye Marquise Teafale Lenard Jr ndetse n’umunya-Senegal Maouhamadou Diagne yakinnye umukino we wa mbere muri iyi kipe y’Ingabo z’u Rwanda mbere y’imikino ya kamarampaka.
APR BBC yitwaye neza muri uyu mukino ibasha kuwutsinda ku manota 84-82 bituma iba iya mbere ku rutonde ntakuka rwa Shampiyona.
Abakinnyi barimo Filer Jovon Adonis watsinze amanota 13, Mpoyo Axel watsinze amanota 12, Isaiah Briscoe watsinze amanota 11 na Marquise Teafale Lenard Jr nawe watsinze amanota 11 ni bamwe mu bafashije APR BBC y’umutoza James Edwards Maye Jr kwitwara neza muri uyu mukino.
Ku ruhande rwa RSSB Tigers y’umutoza Henry Mwinuka, abakinnyi barimo Zouzoua Nisre Mimi watsinze amanota 29 na Antino Antino Alvalezes Jackson watsinze amanota 16 ni bamwe mu bitwaye neza muri uyu mukino n’ubwo bitabashije guhesha intsinzi RSSB Tigers.
Nyuma y’uko imikino isanzwe ya Shampiyona ishyizweho akadomo, APR BBC yasoje ari iya mbere n’amanota 30, ikurikirwa na Patriots BBC n’amanota 29, REG BBC ni iya gatatu n’amanota 27 inganya na RSSB Tigers ya kane ariko ikayiza imbere kuko yayitsindiye.
Ibi bivuze ko mu mikino ya kamarampaka, APR BBC izakina na RSSB Tigers muri 1/2 naho Patriots BBC ikazisobanura na REG BBC.
Kepler BBC yasoreje ku mwanya wa 5 n’amanota 23 inganya na UGB ya 6 yari yakinnye imikino ya kamarampaka ubushize, EAUR BBC ni iya 7 n’amanota 22, AZOMCO ni iya 8 n’amanota 19 naho Inspired Generation yarangije ari iya 9 n’amanota 16.
Biteganyijwe ko amakipe ya AZOMCO na Inspired Generation agomba gusubira mu cyiciro cya kabiri.
