Muhoza Eric yegukanye isigananwa ry’amagare rya Ingufu n’Igare ryakinwe ku nshuro yaryo ya mbere kuri uyu wa Gatandatu tariki 25 Nyakanga 2026 mu cyiciro cya bagabo, naho Nyirarukundo Claudette ahiga abandi mu cyiciro cy’abagore.
Abasiganwe mu isiganwa rya Ingufu n’Igare bahagurikiye ku Ruyenzi, basoreza i Kayonza mu ntera ya kilometero 96.3 (96.3 km).
Mu cyiciro cy’abagabo, Muhoza Eric ukinira Team Amani yahize abandi akoresheje amasaha 2, amasegonda 44 n’amatsiyerisi 24, yasize Tuyizere Etienne wa kabiri ukinira Java Inovotec Pro Team umunota umwe n’amasegonda 37 naho Nshutiraguma Kevin ukinira Cine Elmay Cycling Club yaje ku mwanya wa gatatu akoresheje amasaha abiri, amasegonda 46 n’amatsiyerisi 3, bivuze ko yarushwaga n’uwa mbere umunota umwe n’amasegonda 39.
Abasiganwe muri rusange ni abakinnyi 22 baturutse mu makipe 10 atandukanye.
Mu cyiciro cy’abagore, Nyirarukundo Claudette yahize abandi akoresheje amasaha 3, iminota 9 n’amatsiyerisi 44, akurikirwa na Nirere Xaveline bakinana muri Team Amani warushijwe itsiyerisi rimwe, naho Ingabire Diane wa Benediction Cycling Club yaje ku mwanya wa gatatu arushijwe amasegonda 11 n’amatsiyerisi 4.
Abahatanye muri rusange bari bane (4) baturutse mu makipe 3 atandukanye, uwabaye uwa kane ari nawe wa nyuma ni Byukusenge Mariatte wa Sina Cycling Club warushijwe amasegonda 11 n’amatsiyerisi 26.
Uretse aba bakinnyi bahatanye mu cyiciro cy’ababigize umwuga, abandi bahatanye mu cyiciro cy’abatarabigize umwuga (Amateurs) mu bagabo gusa, bahagurikira Rugende basoreza Kayonza, ku ntera ya kilometero 50 (50 Km).
Muri iki cyiciro, Nkurunziza Yves yahize abandi akoresheje isaha imwe, amasegonda 31 n’amatsiyerisi 25, yakiriwe na Roman Meszaros warushijwe amatsiyerisi na Niyonshuti Asuman nawe warushijwe amatsiyerisi.
Ibindi byiciro byahatanye ni mu bangavu n’ingimbi, abahatanye muri iki cyiciro nabo bahagurikiye Rugende basoreza Kayonza ku ntera ya kilometero 50.
Mu ngimbi, Ishimwe Brian ukinira Black Mamba Development yahize abandi akoresheje amasaha 2, amasegonda 45 n’amatsiyerisi 45, yakiriwe na Byusa Pacific ukinira Les Amis Sportifs warushijwe amasegonda 25 na Mugabo Jules ukinira Ziip Cycling Academy warushijwe amasegonda 3 n’amatsiyerisi 30, abahatanye muri rusange ni abakinnyi 10.
Mu bangavu hahatanye abakinnyi 9 bahizwe na Masengesho Yvonne ukinira Black mamba development akoresheje isaha imwe, amasegonda 38 n’amatsiyerisi 52, yarushije amatsiyerisi macye Akimana Donatha ukinira Ngarama Sports Academy wabaye uwa kabiri.
Umwanya wa gatatu wegukanwe na Kanyange Zawadi ukinira Bugesera Cycling Team warushijwe itsiyerisi rimwe na Masengesho wabaye uwa mbere.
