Guverinoma ya Singapore yatangaje ko Perezida Paul Kagame ari muri iki gihugu mu ruzinduka rw’akazi rw’iminsi itandatu.
Ni amakuru Singapore yatangaje tariki ya 17 Nzeri 2024, ibinyujije ku rubuga rwa Minisiteri y’Ububanyi n’Amahanga. Batangaje ko uru uruzinduko rwa Perezida Kagame ruhera ku wa 18-23 Nzeri 2024.
Itangazo rirakomeza riti “Nk’ibihugu binyamuryango by’lhuriro ry’lbihugu bifite ubuso buto (Forum of Small States: FOSS), Singapore n’ Rwanda bikorana bya hafi mu guteza imbere inyungu z’ibihugu bito ndetse no guha imbaraga gahunda ihuriweho n’ibyo bihugu.”
Uruzinduko rwa Perezida Kagame muri Singapore rubaye urwa gatanu agiriye muri icyo gihugu gifite ubuso bwa kilometero kare 734.3, gituwe n’abaturage barenga miliyoni eshanu. Uruheruka ni urwo yagiriye muri iki gihugu muri Nzeri 2022.
Muri urwo ruzinduko biteganyijwe ko Perezida Kagame azagirana ibiganiro na mugenzi we Tharman Shanmugaratnam na Minisitiri w’Intebe wa Singapore, Lawrence Wong, unasanzwe ari Minisitiri w’Imari.
Biteganyijwe kandi ko Perezida Kagame azakirwa ku meza n’uwahoze ari Minisitiri w’Intebe wa Singapore, Lee Hsien Loong.
U Rwanda na Singapore bikunze gufatanya mu nzego zitandukanye. Bihuriye mu muryango FOSS uhuriwemo n’ibihugu byo ku migabane itandukanye, bifatanya mu kwiteza imbere no guhangana n’ibibazo biba byugarije ibihugu bito. Uyu muryango washinzwe na Singapore mu 1992.
