Nyuma y’uko imikino isanzwe ya Shampiyona (Regular Season) ishyizweho akadomo igasiga hamenyekanye amakipe 4 azishakamo ikipe izegukana igikombe cya Shampiyona y’u Rwanda ya basketball mu bagabo, Ishyirahamwe ry’Umukino wa Basketball mu Rwanda, FERWABA, yashyize hanze ingengabihe y’uko imikino ya kamarampaka izakinwa.
Amakipe azakina imikino ya kamarampaka ni amakipe 4 ya mbere ku rutonde rwa Shampiyona ayobowe na APR BBC, ikurikirwa na Patriots BBC, hakaza REG BBC naho RSSB Tigers BBC ikaba iya kane.
Nk’uko bisanzwe, ikipe ya mbere ihura n’iya kane, bivuze ko APR BBC izahura na RSSB Tigers BBC, naho ikipe ya kabiri igahura n’iya gatatu bivuze ko Patriots BBC izahura na REG BBC muri 1/2.
Mu mikino ya 1/2 biba biteganyijwe ko amakipe akina imikino 5 agatanguranwa gutsinda imikino 3, naho ku mukino wa nyuma, amakipe akina imikino 7 agatanguranwa gutsinda imikino 4.
Ku ngengabihe y’imikino ya kamarampaka FERWABA yashyize ahagaragara, imikino ya mbere izakinwa ku wa Gatatu tariki 5 Kanama 2026 naho imikino ya kabiri izakinwa ku wa Gatanu tariki 7 Kanama 2026, iyi mikino yose izabera muri BK Arena saa 18:30 na 21:00.
Umukino wa REG BBC na Patriots BBC niwo uzajya ubimburira uwa APR BBC na RSSB Tigers.
Imikino y’umunsi wa gatatu izakinwa ku Cyumweru taiki 9 Kanama 2026 muri Petit Stade, habanze umukino wa Patriots BBC na REG BBC saa 18:00 naho APR BBC ikine na RSSB Tigers zikine saa 20:30.
Ni biba ngombwa ko hiyambazwa imikino ya kane izakinwa tariki 11 Kanama 2026, umukino wa mbere ukinwe saa 18:30 naho uwa kabiri ukinwe saa 21:00.
Uyu mukino nudaca impaka hakiyambazwa uwa gatanu, imikino izakinwa tariki 13 Kanama 2026 saa 18:30 na 21:00.
Nyuma y’uko hazaba hamaze kumenyekana amakipe yerekeza ku mukino wa nyuma, umukino wa mbere muri irindwi iba iteganyijwe, uzakinwa tariki 16 Kanama 2018 saa 18:30 muri BK Arena, naho uwo guhatanira umwanya wa gatatu uzaba wabaye mbere yaho gato saa 16:00.
Uretse RSSB Tigers itaratwara igikombe cya Shampiyona y’u Rwanda na rimwe, andi makipe agiye gukina iyi mikino ya kamarampaka yose yagitwayeho kuva mu bihe bizwi mu 1995.
APR BBC niyo kipe imaze gutwara igikombe cya Shampiyona y’u Rwanda inshuro nyinshi, 16 harimo n’imyaka 3 iheruka kuva muri 2023, Patriots BBC 4 naho REG BBC yagitwaye 3.
