Ikipe ya RSSB Tigers yamaze gusinyisha umukinnyi Tyler Tarik Bey ukina nka forward ukomoka muri Leta Zunze Ubumwe za Amerika ngo azayifashe mu mikino ya kamarampaka iteganyijwe gutangira tariki 5 Kanama 2026.
Tyler Tarik Bey w’imyaka 27 ni umukinnyi wa metero 2.1 wanyuze muri Shampiyona ya Leta Zunze Ubumwe za Amerika, NBA, mu ikipe ya Dallas Mavericks mu mwaka wa 2020-2021.
Tarik yari yatorewe (Drafted) kwinjira muri NBA n’ikipe ya Philadelphia 76ers nk’umukinnyi wa 36 mu gice cya kabiri cy’abakinnyi (2nd round, 36th overall pick) mbere y’uko ahita agurishwa muri Dallas Mavericks.
Tarik ntabwo yamaze igihe muri NBA kuko yahise atizwa mu makipe arimo Long Island Nets na Salt Lake City Stars yo muri Shampiyona y’icyiciro cya kabiri muri Leta Zunze Ubumwe za Amerika, NBA G League, ari nayo Shampiyona yahise akomerezamo akanayitwara muri 2022 ari mu ikipe ya Rio Grande Valley Vipers.
Tyler Tarik Bey yakiniye andi makipe atandukanye arimo Ironi Ness Ziona na Hapoel Haifa Basketball Club zo muri Israel aho yanabaye umukinnyi wahize abandi mu gutsinda amanota menshi muri Shampiyona ya 2023 ari mu ikipe ya Ironi Ness Ziona, Magnolia Hotshots yo muri Philippine, Taipei Fubon Braves yo muri Taiwan, Homenetmen Beirut yo muri Lebanon na Trotamundos BBC yo muri Venezuela ari nayo kipe aherukamo.
RSSB Tigers isanzwe ifite abandi bakinnyi bakomeye barimo Antino Alvalezes Jackson, Zouzoua Nisre Mimi, Hagumintwari Steven, Bizimana Paul, Ishimwe Licken Lars, Odero Albert Einstein Onyango, Roberts Nathaniel Anthony n’abandi.
Ikipe ya RSSB Tigers iheruka kwegukana igikombe cya BAL izahura n’ikipe ya APR BBC muri 1/2 cy’imikino ya kamarampaka nyuma y’uko isoreje ku mwanya wa kane naho APR BBC igasoreza ku mwanya wa mbere.
