Mu Rwanda hatangijwe ku mugaragaro Ishuri Nyafurika ry’Abagore mu buyobozi bwa politiki (African Academy for Women in Political Leadership), rije gukemura ikibazo cy’ubuke bw’abagore mu nzego zifata ibyemezo.
Ryafunguriwe i Kigali kuri uyu wa Mbere tariki 3 Kanama 2026.
Iyi gahunda ihuriweho n’Umugabane wa Afurika igamije guha abagore bari mu buyobozi bwa politiki ubumenyi n’ubushobozi bwo kuyobora mu buryo bufite ireme.
Icyiciro cya mbere cyatangiye kigizwe n’abagore 40 bari mu myanya y’ubuyobozi bwa politiki barimo ba Minisitiri, Abadepite, Abayobozi b’Inteko Zishinga Amategeko, Abayobozi b’uturere n’abayobozi b’amashyaka ya politiki baturutse mu bihugu 28 byo muri Afurika na Karayibe.
Iri shuri ryashyizweho ku bufatanye bw’Ishuri Nyafurika ry’Imiyoborere (African School of Governance – ASG), Ishami ry’Umuryango w’Abibumbye ryita ku Iterambere (UNDP) na Komisiyo y’Umuryango wa Afurika Yunze Ubumwe (AUC).
Ryitezweho guha abagore bari muri politiki cyangwa abifuza kugira ubumenyi n’ubushobozi bwo kuyobora mu buryo bufite ireme no guhuza abagore bayobora baturuka mu bice bitandukanye bya Afurika ngo basangire ubunararibonye.
Umuyobozi Mukuru w’Ishuri Nyafurika ry’Imiyoborere (ASG), Francis Gatare, yashimangiye ko kwakira iri shuri ari ishema n’inshingano ikomeye ASG yiteguye gusohoza neza kugira ngo ejo hazaza ha politiki ya Afurika habe heza kandi hadaheza.
Catherine Samba-Panza wabaye Perezida wa Santarafurika, yagaragaje ko gushyira umugore mu nzego za politiki bishimangira imbaraga n’icyerekezo Umugabane wa Afurika ukwiye, bityo ko kugira ishuri nk’iri ari ikimenyetso kitagaragaza gusa ugutyaza ubwenge bw’abagore mu nzego z’ubuyobozi, ahubwo ko ari no gutegura ahazaza h’urwego rw’imiyoborere muri Afurika.
Sahle-Work Zewde na we wabaye Perezida wa Ethiopia, yavuze ko ishuri nk’iri ari ingenzi cyane ko ritazategurira abagore bazaryigamo kujya mu nzego z’ubuyobozi gusa ahubwo rizabaha n’ubushobozi bwo gukemura ibibazo bya politiki n’umutekano bigaragara muri Afurika.
Imibare igaragaza ko umubare w’abagore bari mu nzego zifata ibyemezo n’iza politiki muri Afurika ukiri hasi cyane.
