Ikipe ya Al Hilal SC Omdurman yatangaje ko yamaze gusinyisha umutoza w’umudage Josef Zinnbauer nk’umutoza wayo mushya mu gihe cy’imyaka ibiri iri imbere.
Josef Zinnbauer w’imyaka 56 si mushya muri Afurika kuko aheruka mu ikipe ya JS Kabylie yo muri Algeria ndetse yanyuze no mu yandi makipe arimo Orlando Pirates yo muri Afurika y’Epfo na Raja Casablanca yo muri Maroc.
Aha yanahakoreye amateka ahatwarira ibikombe bitatu birimo igikombe cya Shampiyona ya Maroc n’Igikombe cy’igihugu muri Maroc yatwaranye na Raja Casablanca muri 2023/24, ndetse n’igikombe cya MTN8 Cup yatwaranye na Orlando Pirates muri 2020/21.
Zinnbauer yanyuze no muri Aziya mu ikipe ya Al Wehda yo muri Saudi Arabia ndetse yatoje n’amakipe yo ku mugabane w’u Burayi arimo Lokomotic Moscow yo mu Burusiya, Hamburger SV yo mu Budage, FC St. Gallen yo mu Busuwisi n’izindi.
Al Hilal isinyishije uyu mutoza nyuma yo gutandukana n’umunya-Romania Laurențiu Reghecampf wamaze kugirwa umutoza mushya wa Espérance Sportive de Tunis yo muri Tunisia.
Muri iyi minsi iyi kipe yaritarabona umutoza mukuru yari yabaye iragijwe Guy Bukasa uzajya utoza ikipe ya kabiri ya Al Hilal ndetse n’amakipe yayo y’abato yose.
Guy Bukasa niwe wari umutoza wa Al Hilal mu irushanwa riheruka kwegukanwa na Rayon Sports rya CECAFA Kagame Cup, ndetse ntabwo yagaragaje urwego rwiza kuko iyi kipe yo muri Sudani yahabwa amahirwe yo kuryegukana yasoreje ku mwanya wa gatatu.
Biteganyijwe ko ikipe ya Al Hilal izongera igakina Shampiyona y’u Rwanda muri uyu mwaka w’imikino nyuma yo kuyikina bwa mbere umwaka ushize wa 2025/26 igahita inayegukana, iyi kipe izanahagararira Sudani mu mikino ya CAF Champions League aho izahura na Aigle Noir CS yo mu Burundi mu ijonjora rya mbere.
