Ikipe ya REG W BBC yatsinze The Hoops Rwanda amanota 77-48 mu mukino wa kabiri w’imikino ya nyuma ya kamarampaka mu bagore, Cheetah Energy RBL Playoffs, wabereye muri BK Arena kuri uyu wa Gatandatu tariki 22 Kanama 2026.
REG W BBC y’umutoza Mukaneza Esperance yatangiye neza muri uyu mukino watangiye saa 19:00 itsinda amanota 18-12 mu gace ka mbere, n’amanota 26-8 mu gace ka kabiri bituma igice cya mbere kirangira REG W BBC itsinze The Hoops amanota 44-20.
Mu gace ka gatatu, The Hoops yitwaye neza itsinda amanota 18-15 n’ubwo bitari bihagije ngo ikuremo ikinyuranyo yari yashyizwemo, naho mu gace ka kane, REG yongeye kwitwara neza itsinda amanota 18-10.
Umukino muri rusange warangiye REG itsinze amanota 77-48, uba umukino wa kabiri itsinze mu mikino 7 iteganyijwe. Ibi bivuze ko REG nitsinda indi mikino 2 izahita yegukana igikombe cya Shampiyona ku nshuro ya 3 yikurikiranya.
Irakoze Ange Nelly yitwaye neza muri uyu mukino atsindira REG W BBC amanota 15, akora rebounds 9, yambura umupira inshuro 2.
King Kristina Morgan nawe yitwaye neza atsinda amanota 13 muri uyu mukino, Tetero Odile atsinda amanota 11 naho Washington Delicia Ty’rae na Hosendove Taylor Lynn batsinze amanota 10 buri umwe.
Umukino wa 3 wa nyuma uteganyijwe ku wa mbere tariki 24 Kanama 2026 muri BK Arena saa 19:00.
Undi mukino wagombaga gukinwa kuri uyu wa Gatandatu ni uwagombaga guhuza Kepler W BBC na APR W BBC mu guhatanira umwanya wa 3.
Uyu mukino warangiye APR iteye mpaga itsinda amanota 20-0 nk’uko biteganywa n’itegeko nyuma y’uko Kepler itagaragaye ku kibuga.
Amakuru agera ku Umunota avuga ko nyuma yo gusezererwa bitunguranye muri 1/2 na The Hoops Rwanda, ikipe ya Kepler W BBC yanzuye ko itazakina imikino yo guhatanira umwanya wa gatatu.
Bigenze uko, APR W BBC iheruka igikombe cya Shampiyona muri 2024 yahita yegukana umudari w’umuringa w’umwanya wa 3 mu buryo budasubirwaho.
