Ikipe ya Commercial Bank of Ethiopia (CBE) yatsinzwe na Kawempe Muslim Ladies igitego 1-0 naho Simba Queens itsindwa na Kenya Police Bullets WFC ibitego 2-1 muri CECAFA y’abagore yo gushaka itike ya CAF Women’s Champions League.
Kuri uyu wa Mbere tariki 24 Kanama 2026 muri Kigali Pele Stadium habereye imikino ibiri yo mu itsinda B na C muri CECAFA y’abagore.
Umukino wa mbere wo mu itsinda C watangiye saa 13:00 wahuje Kenya Police Bullets WFC yo muri Kenya na Simba Queens yo muri Tanzania.
Simba Queens yari yaratsinze umukino wa mbere bivuze ko yasabwaga gutsinda cyangwa kunganya kugira ngo yiyongerere amahirwe yo gukomeza muri 1/2, mu gihe wari umukino wa mbere wa Kenya Police Bullets WFC.
Uyu mukino warangiye Kenya Police Bullets yitwaye neza itsinda Simba Queens ibitego 2-1.
Ibitego bya Kenya Police Bullets byatsinzwe na Faith Mboya ku munota wa 17 na Martha Amunyolette Emedot ku munota wa 78 naho igitego cya Simba Queens cyatsinzwe na Senaf Wakuma Demise ku munota wa 68.
Kenya Police Bullets FC yahise iyobora itsinda C n’amanota 3 inganya na Simba Queens, ariko Kenya Police Bullets iracyafite umukino izahuramo na Top Girls Academy yo mu Burundi, irasabwa kuwutsinda cyangwa ikanganya igahita ikomeza.
Undi mukino wakinwe wahuje Kawempe Muslim Ladies FC yo mu Bugande yakinaga umukino wayo wa mbere na CBE WFC yakinaga umukino wayo wa kabiri wo mu itsinda B nyuma yo kunyagira FC Ujeco ibitego 11-0.
CBE yahabwaga amahirwe yo kwitwara neza ntabwo byayikundiye kuko yatsinzwe igitego 1-0 na Kawempe Muslim Ladies FC.
Igitego kimwe rukumbi cyabonetse muri uyu mukino cyatsinzwe na Agnes Nabukenya ku munota wa 11 kuri penaliti.
Nyuma y’uyu mukino, CBE iracyayoboye itsinda n’amanota 3 n’ibitego 10 yizigamye, Kawempe Muslim Ladies ni iya kabiri n’amanota 3 n’igitego 1 yizigamye naho FC Ujeco yo muri Djibouti ni iya nyuma muri iri tsinda ntanota na rimwe ifite n’umwenda w’ibitego 11.
Ku munsi wa nyuma w’iri tsinda Kawempe Muslim Ladies izakina na FC Ujeco, ikaba isabwa gutsinda cyangwa kunganya igahita izamuka muri 1/2.
Imikino ya CECAFA y’abagore irakomeza kuri uyu wa kabiri hakinwa imikino 2 yo mu itsinda A ari nayo ya nyuma muri iri tsinda, iyi mikino yombi izabera rimwe guhera saa 15:00.
Mafunzo WSC yo muri Zanzibar izakina na Denden WFC yo muri Eritrea ku kibuga giherereye kuri Hoteli ya FERWAFA iherereye i Remera, naho Rayon Sports yo mu Rwanda ikine na Yei Joint Stars yo muri Sudani y’Epfo kuri Kigali Pele Stadium.
Kugira ngo Rayon Sports ikomeze muri 1/2 birayisaba gutsinda ikazamuka ari iya mbere, cyangwa ikanganya ikazamuka ari iya kabiri, mu gihe yatsindwa yazamuka bitewe n’uko umukino wa Mafunzo na Denden waba warangiye.
