Umuhanzi w’umuraperi, Ish Kevin, yashyize hanze umuzingo w’indirimbo (Album) nshya yise “Trapish III: Win Some, Lose Some”, ugizwe n’indirimbo 10.
Iyi Album yasohotse kuri uyu wa 18 Nzeri 2026, ikaba ikomereza ku rugendo yatangiriye kuri “Trapish II” yasohotse muri Gicurasi 2022.
Mbere y’uko isohoka ku mugaragaro, mu ijoro ryatambutse Ish Kevin yakoze ibirori byo kuyisogongeza ababyitabiriye byabereye muri La Noche ndetse byarimo n’abandi bahanzi nka Diez Dola, Logan Joe, OG2Tone, Ririmba, Pro Zed na Bibiboi.
Kuri iyi Album hariho indirimbo zitandukanye zamaze kumenyekana zirimo “Abajeune”, “Question” yakoranye na Kenny Sol, “Chat Chat” ndetse na “Best Friend” yakoranye na Njerae.
“Trapish III: Win Some, Lose Some” kandi igaragaraho abandi bahanzi barimo Logan Joe, Buruklyn Boyz, OG2Tone, Pro Zed, Bibiboi na Ririmba, bagize uruhare mu gutuma uyu mushinga uhuza injyana n’imyumvire bitandukanye.
Mu butumwa yanyujije kuri Instagram ku bijyanye n’iyi Album, Ishimwe Semana Kevin, wamamaye nka Ish Kevin, yavuze ko yashyizemo imbaraga nyinshi, ashyiramo umuziki uvanze n’inkuru, imbaraga, umuco, injyana zitandukanye ndetse n’ubufatanye n’abandi bahanzi.
