Axel Rudakubana, ufite inkomoko mu Rwanda akaba yarakatiwe gufungwa imyaka 52 kubera kwica abana batatu mu gitero cyabereye i Southport mu Bwongereza, yongeye kuburana ku byaha byo kugirira nabi abakozi ba gereza.
Mu iburanisha ryabaye kuri uyu wa Mbere tariki ya 21 Nzeri 2026, Urukiko rwa Westminster rwabwiwe ko Rudakubana akekwaho gusuka amazi ashyushye ku mukozi wa gereza ya Belmarsh, ndetse no gukubita undi mukozi mu maso.
Aregwa kandi gutera ubwoba umukozi w’umugore amubwira ko amusukaho amazi ashyushye, ndetse no kugirira nabi abandi bakozi b’ubutabazi n’abashinzwe umutekano muri gereza.
Rudakubana yaburanye hifashishijwe ikoranabuhanga, ari mu bitaro by’indwara zo mu mutwe bya Broadmoor. Biteganyijwe ko azongera kugaragara imbere y’Urukiko rwa Old Bailey ku wa 19 Ukwakira 2026.
Muri Mutarama 2025, Rudakubana yakatiwe imyaka 52 nyuma yo guhamwa n’icyaha cyo kwica abana batatu, barimo Silva Aguiar, Bebe King na Elsie Dot Stancombe, ndetse no kugerageza kwica abandi bantu 10.
Tariki 20 Mutarama 2025 nibwo Axel Rudakubana yemereye urukiko rwa Liverpool mu Bwongereza ko yishe abana batatu tariki ya 29 Nyakanga 2024, abateye icyuma ndetse yemera n’ikindi cyaha cyo kugerageza kwica abandi bantu 10 barimo abana umunani aho byose yabikoze ubwo yari afite imyaka 17.
