Ikipe y’Igihugu ya Misiri yegukanye igikombe cya Afurika cya handball mu ngimbi zitarengeje imyaka 18 cyaberaga i Abidjan muri Côte d’Ivoire, naho u Rwanda rusoreza ku mwanya wa 8 mu makipe 14 yacyitabiriye.
Kuri uyu wa Kabiri tariki 22 Nzeri 2026, nibwo hasojwe ku mugaragaro iki Gikombe cya Afurika cyakinwaga ku nshuro yacyo ya 22 hakinwa umukino wa nyuma wahuje Misiri na Tunisia.
Uyu mukino warangiye Misiri itsinze Tunisia ibitego 28-25, ihita yegukana iki Gikombe ku nshuro yayo ya kane yikurikiranya, iba iya munani (8) mu nshuro icyenda (9) ziheruka.
Misiri ni nayo yari yatwaye igikombe cya Afurika mu batarengeje imyaka 20 cyabaye mbere gato y’iki cy’abatarengeje 18 n’ubundi i Abidjan muri Côte d’Ivoire.
Umwanya wa gatatu wegukanwe na Maroc nyuma yo gutsinda Guinea ibitego 18-17, aya makipe yombi yari no mu itsinda rimwe n’u Rwanda.
Ikipe y’u Rwanda y’umutoza Bagirishya Anaclet yasoreje ku mwanya wa 8 nyuma y’uko yatsinzwe na Côte d’Ivoire mu mukino wo guhatanira umwanya wa 7-8.
Iminota 60 isanzwe y’umukino yarangiye amakipe yombi anganya ibitego 26-26 bituma hiyambazwa penaliti, Côte d’Ivoire yatsinzemo enye (4) naho u Rwanda rutsinda 1, umukino urangira ari ibitego 30-27.
Nyuma y’uko iri rushanwa risojwe, amakipe 5 ya mbere yahise abona itike yo kuzakina igikombe cy’isi cya 2027, IHF Men’s Youth World Championship.
Uretse amakipe 4 yageze muri 1/2, indi kipe yabonye itike ni Cameroon yasoreje ku mwanya wa 5 nyuma yo gutsinda Nigeria ibitego 32-30.
