Kuri uyu wa Gatanu tariki 25 Nzeri 2026, Ikipe y’Igihugu y’u Rwanda “Amavubi” n’iya Liberia “The Lone Star” ziratana mu mitwe mu mukino utangiza urugendo rwo gushaka itike y’igikombe cya Afurika cya 2027 kizabera muri Kenya, Tanzania na Uganda.
U Rwanda nirwo ruzakira uyu mukino kuri Sitade Amahoro, ukazatangira saa kumi n’ebyiri z’umugoroba (18h00) ku isaha y’i Kigali. Aya makipe yombi ari kumwe mu itsinda K hamwe na Mali na Cape Verde nazo zizatana mu mitwe kuri uyu wa Gatanu.
U Rwanda rufite imibare myiza imbere ya Liberia
Urebeye ku mibare, Ikipe y’Igihugu y’u Rwanda “Amavubi” ni yo ihagaze neza kurusha iya Liberia cyane ko u Rwanda ruri ku mwanya wa 128 ku rutonde rw’Impuzamashyirahamwe y’Umupira w’Amaguru ku Isi, FIFA, naho Liberia ikaba ku wa 140.
Mu mikino 10 ishize, Amavubi yatsinzemo imikino 3, anganya umwe, atsindwa 6, yinjiza ibitego 8, yinjizwa 12. Ni mu gihe Liberia yatsinzemo 3, inganya 3, itsindwa 4, aho yinjije ibitego 13, yinjizwa 15.
Mu mikino 10 u Rwanda ruheruka kwakira rwatsinzemo imikino 5, runganya 2, rutsindwa 3 mu yo Liberia iheruka gukinira hanze yatsinzemo umwe, inganya 2, itsindwa 7. Ibi bigaragaza ko Amavubi aba meza iyo yakiriye, mu gihe Liberia igorwa cyane no gukinira hanze.
Aya makipe aheruka guhura hagati yayo tariki 8 Nzeri 2007 ubwo n’ubundi yari mu rugendo rwo gushaka itike y’Igikombe cya Afurika.
Icyo gihe u Rwanda rwatsindiye Liberia kuri Sitade Amahoro ibitego 4-0 byatsinzwe na Bokota Labama, Said Makasi, Jeannot Witakenge na Karekezi Olivier. Mu mwaka wari wabanje Liberia nayo yari yaratsinze u Rwanda ibitego 3-2, mu mukino yari yakiriye.
Abakinnyi bo kwitega ku mukino w’u Rwanda na Liberia
Ku ruhande rw’Amavubi bamwe mu bakinnyi bo kwitega barimo Joy-Lance Mickels, rutahizamu w’ikipe ya Sabah FK yo muri Azerbaijan iri gukina UEFA Champions League ndetse akaba abanza mu kibuga.
Ni ubwa mbere Joy-Lance Mickels agiye gukinira Amavubi muri iyi mikino, ndetse kugeza ubu nta gitego arabasha kuyatsindira ariko ni umukino wo kwitega.
Undi wo kwitega ni murumuna we Leroy-Jacques Mickels ukinira ikipe ya Waldhof Mannheim yo mu cyiciro cya gatatu mu Budage.
Uyu mukinnyi w’imyaka 31 y’amavuko yitwaye neza mu gihe aheruka mu Amavubi kuko yayafashije kwitwara neza yegukana igikombe cya FIFA Series nyuma yo gutsinda ibitego 2 mu mikino ibiri yakinnye.
Bamwe mu bandi bakinnyi bo kwitega kuri uyu mukino barimo kapiteni Djihad Bizimana ukina mu kibuga hagati hamwe na Mugisha Bonheur ‘Casemiro’ ukinira Al-Hazem SC yo muri Saudi Arabia na myugariro Mutsinzi Ange ukinira Zira FK muri Azerbaijan.
Ku ruhande rwa Liberia, bamwe mu bakinnyi bo kwitega barimo myugariro Sampson Dweh ukinira FC Viktoria Plzeň yo muri Repubulika ya Czech iri gukina UEFA Europa League kuri ubu.
Abandi bakinnyi barimo umukinnyi wo mu kibuga hagati Oscar Dorley ukinira Al Taawoun muri Saudi Arabia, Mo Sangare ukinira Etoile Sportive du Sahel yo muri Tunisia, myugariro Emmanuel Fully ukinira SK Artis Brno yo muri Repubulika ya Czech na rutahizamu Ayoubа Kosia ukinira FK Radnik Surdulica yo muri Serbia.
Aba bakinnyi biyongera kuri Emmanuel Flomo usanzwe akinira Al Hilal SC Omdurman ikina Shampiyona y’u Rwanda, BK Pro League, ndetse wanahawe igihembo cy’umukinnyi ukiri muto witwaye neza umwaka ushize.
Flomo ntiyari yahamagawe mbere, yashyizwe mu bakinnyi bazakina uyu mukino asimbura Joseph Melto Quiah.
Abatoza nabo ntiboroshye ku mpande zombi
Ku ruhande rw’abatoza, Stephen Constantine yagizwe umutoza w’Amavubi mu Werurwe uyu mwaka, gusa si ubwa mbere yari ayatoje kuko no hagati ya 2014 na 2015 yabaye umutoza mukuru ndetse yayagejeje ku mwanya mwiza yagize mu mateka ku rutonde rwa FIFA, umwanya wa 68.
Uyu mutoza kuva yahagera ntabwo u Rwanda ruratsindwa umukino n’umwe ndetse rwanegukanye igikombe cya FIFA Series.
Mu mikino ibiri amaze gutoza, u Rwanda rwarayitsinze yose, rwinjije ibitego 6, ntirwinjizwa igitego na kimwe.
Ku ruhande rwa Liberia, umutoza wayo mukuru ni umunya-Maroc Mohammed Adil Erradi wagiye kuri uyu mwanya muri Gicurasi uyu mwaka.
Adil amaze gutoza Liberia imikino 2, yatsinzemo umukino umwe, atsindwa undi, yinjije ibitego 3, yinjiza bibiri (2).
N’ubwo Mohammed Adil Erradi ari mushya ku mwanya wo gutoza Liberia ariko si mushya mu Rwanda kuko yahatoje imyaka 3 ubwo yari muri APR FC.
Benshi mu bakinnyi b’Amavubi ntabwo ari bashya kuri we kuko yabatoje, abandi akaba yaratoje mu Rwanda nabo ariho bakina, gusa Constantine yavuze ko ibi ntakibazo bimuteje kuko afite amayeri yihariye azakoresha.
Kuri uyu wa Kane tariki 24 Nzeri 2026 nibwo amakipe yombi akora imyitozo ya nyuma yitegura umukino wo kuri uyu wa Gatanu, ndetse biteganyijwe ko abatoza aribwo bari buvuge byinshi kuri uyu mukino mu kiganiro bagirana n’itangazamakuru.
