Minisitiri wa Siporo, Nelly Mukazayire, yakiriye anashimira Ikipe y’Igihugu y’u Rwanda, Amavubi, nyuma yo kwegukana intsinzi ebyiri zikurikiranya mu mikino yo gushaka itike y’Igikombe cya Afurika cya 2027.
Amavubi yatsinze Liberia ibitego 3-1 mu mukino wabereye kuri Stade Amahoro ku wa 25 Nzeri 2026, mbere yo gutsindira Cape Verde iwayo ibitego 2-1 ku wa Kabiri tariki 29 Nzeri 2026.
Nyuma yo kugaruka mu Rwanda, Minisitiri Nelly Mukazayire ari kumwe n’ubuyobozi bw’agateganyo bwa FERWAFA buyobowe na Me Gasarabwe Claudine, bakiriye abagize ikipe y’igihugu mu birori byabereye muri Kigali Convention Centre ku wa Gatanu tariki ya 2 Ukwakira 2026.
Muri uku kwakira Amavubi, Minisitiri Mukazayire yashimiye abakinnyi n’abatoza ku bwitange bagaragaje, cyane cyane nyuma yo gutsindira Cape Verde imbere y’abafana bayo.
Izi ntsinzi zombi zatumye Amavubi atangira neza imikino yo mu Itsinda K yo gushaka itike ya AFCON 2027, aho afite amanota atandatu nyuma y’imikino ibiri.
Minisitiri Mukazayire yakomoje ku mbogamizi bahuye nazo mu rugendo bava i Parai muri Cape Verde baza i Kigali, kubera kugorwa no gutega indege rusange, abizeza ko kigiye gukemurwa bakajya bahabwa indege yihariye mu ngendo zayo.
Abakinnyi kandi bashyikirijwe agahimbazamushyi ka miliyoni 3 Frw nyuma yo kwitwara neza mu mikino ibiri iheruka.
Amavubi azakomeza urugendo rwo gushaka itike mu Ugushyingo 2026, aho azahura na Mali mu mikino ibiri ikurikirana, ariko afite umukino wa gicuti n’Ikipe y’Igihugu ya Kenya, ku wa Mbere tariki 5 Ukwakira 2026, ssaa 18:00 muri Stade Amahoro.
