HiPipo Music Awards ni ibihembo bihuriza hamwe abahanzi n’abandi bakora mu muziki wo muri Afurika, bigamije gushimira ibikorwa by’indashyikirwa byagezweho mu muziki no kugaragaza abahanzi n’indirimbo byakunzwe mu bice bitandukanye by’umugabane.
Mu 2026, ibihembo bya HiPipo Music Awards bigaragaramo ibyiciro bitandukanye birimo icy’umuhanzi wa mbere muri Afurika, umuhanzi mwiza muri Afurika y’Iburasirazuba ndetse n’indirimbo ikunzwe muri aka karere.
Umuhanzi Nyarwanda The Ben ari mu bahataniye ibihembo bitatu muri iri rushanwa.
Mu cyiciro cy’umuhanzi wa mbere muri Afurika, kizwi nka “Africa Number One”, The Ben ahanganye n’abahanzi barimo Asake, Burna Boy, Ayra Starr, Tyla, Diamond Platnumz, DJ Maphorisa, Jose Chameleone, Joshua Baraka, Mohamed Ramadan na Uncle Waffles.
The Ben kandi ari mu cyiciro cy’indirimbo ikunzwe muri Afurika y’Iburasirazuba, aho indirimbo ye “Inshallah” ihatanye. Muri iki cyiciro kandi harimo “Pom Pom” ya Bruce Melodie na “Ayayaah” ya Element EleéeH.
Mu cyiciro cy’umuhanzi mwiza muri Afurika y’Iburasirazuba, The Ben ahanganye n’abarimo Element EleéeH, Diamond Platnumz na Bien.
Ibi bihembo bitegurwa n’ikigo cyitwa HiPipo (U) LTD. Inkomoko yabyo ishingiye ku gikorwa cyiswe HiPipo Charts Festival cyabaye mu 2012. Ibirori bya mbere byo gutanga ibihembo nyizina byabaye ku wa 9 Gashyantare 2013 kuri Theater La Bonita i Kampala. Kuva icyo gihe byakomeje kuba buri mwaka kugeza ubu aho bimaze kuba kimwe mu birori bikomeye by’umuziki muri Afurika.
Muri ibi bihembo bya HiPipo hahatana indirimbo zasohotse mu mezi 12 ashize.
Ibihembo bya HiPipo Music Awards 2026 bizatangirwa i Kampala muri Uganda, mu birori bizabera muri Kampala Serena Hotel ku wa 13 Ugushyingo 2026.
