Nyuma yo gukura amanota yuzuye i Rubavu itsindiyeyo Marine FC ibitego 2-1 mu mukino w’umunsi wa karindwi wa BK Pro League, Rayon Sports FC ihanze amaso kuri Al Hilal bagiye gucakirana mu mukino w’umunsi wa munani.
Uyu mukino w’sihyiraniro uteganyijwe kuri uyu wa Gatatu, tariki ya 4 Ugushyingo 2026, kuri Kigali Pelé Stadium guhera saa 18:30.
Iyi kipe y’i Nyanza irakina uyu mukino ishaka gukomereza mu mujyo w’intsinzi imazemo iminsi , ariko ikaba inafite inyota yo kwihorera kuri Al Hilal yayinyagiye ibitego 4-0 mu mukino wabahuje muri Mutarama 2026, muri shampiyona.
Mu mikino itatu iheruka guhuza aya makipe, Al Hilal yatsinze Rayon Sports ibitego 4-0 muri Mutarama 2026, amakipe yombi anganya igitego 1-1 muri Gashyantare 2026, mbere y’uko Rayon Sports itsinda Al Hilal igitego 1-0 muri CECAFA Kagame Cup yabaye muri Kanama 2026.
Rayon Sports irinjira muri uyu mukino ifite icyizere cyo kongera kubona amanota atatu, nyuma yo gutsinda imikino ibiri iheruka gukina muri shampiyona. Yatsinze Musanze FC ibitego 3-0, ikurikizaho gutsinda Marine FC ibitego 2-1 mu mukino w’Umunsi wa Karindwi wabereye kuri Stade Umuganda ku Cyumweru. Iyi ntsinzi yayiheshejwe na Herman Junior Kameni watsinze ibitego byombi.
Uyu musaruro uje nyuma y’igihe Rayon Sports yari mu bihe bibi kuko yari imaze imikino umunani idatsinda. Gutsinda imikino ibiri yikurikiranya byayifashije kongera kwiyubaka no kugarura icyizere mu ikipe.
Ku rundi ruhande, Al Hilal nayo irashaka kwisubiza icyubahiro yambuwe na Marine FC ubw yayitsindaga ibitego 3-0 ku mukino w’ikirarane cy’umunsi wa kabiri wa BK Pro League.
Ibi bituma iza guhura na Rayon Sports ishaka amanota atatu kugira ngo yongere kubona umusaruro mwiza, bityo umukino w’aya makipe ukaba utegerejweho guhangana gukomeye kuko impande zombi zikeneye intsinzi.
Rutahizamu wa Rayon Sports, Herman Junior Kameni, yavuze ko nubwo Al Hilal ari ikipe ikomeye, intego yabo ari ukuyitsinda.
Yabitangaje nyuma yo gufasha Rayon Sports gutsinda Marine FC, mumukino yaherewemo igihembo cy’umukinnyi witwaye neza(man of the Match).
Uyu munya-Cameroun w’imyaka 24 uri gufasha Rayon Sports cyane muri yi mikino, yavuze ko intsinzi bakuye kuri Marine yabahaye amanota y’ingenzi, ariko ko bagomba gukomeza kwitwara neza mu mukino bahuramo na Al Hilal.
Yagize ati: “Ni umukino ukomeye, ariko tugomba gutsinda.” Yakomeje agira ati: “Twabonye amanota atatu y’ingenzi, ubu tugomba gukomeza kwihagararaho imbere ya Al Hilal, imwe mu makipe akomeye.”
Rayon Sports igiye gukina umukino wayo wa gatanu muri shampiyona. muri ine imaze gukina, ifitemo amanota 7.
