Amakipe ya Police na APR VC mu bagabo na Police WVC na APR WVC mu bagore agiye guhurira mu mikino ikomeye ya Shampiyona ya Volleyball mu Rwanda, aho buri imwe ishaka gutsinda mukeba wayo kugira ngo ikomeze urugamba rwo guhatanira igikombe.
Iyi mikino iraba kuri uyu wa Gatanu, tariki ya 13 Ugushyingo 2026, muri Petit Stade i Remera, aho mu bagore Police WVC na APR WVC zizakina saa 17:30, mu gihe mu bagabo Police VC na APR VC zizahura saa 20:00.
Mu bagabo, uyu mukino uzaba uhuza amakipe yombi ari mu myanya ibiri ya mbere ku rutonde rwa Shampiyona. APR VC iyoboye n’amanota 11 mu mikino ine, mu gihe Police VC iyikurikiye n’amanota 10.
Abatoza Musoni Fred wa Police na Sammy Mulinge wa APR ni bo bazaba bafite inshingano zo kuyobora amakipe yabo muri uyu mukino ushobora kugira uruhare rukomeye ku isura y’urutonde rwa Shampiyona.
Mu mikino irindwi iheruka guhuza aya makipe kuva mu 2024, APR VC yatsinzemo ine, Police VC itsinda itatu. Muri Shampiyona ya 2025/2026, buri kipe yatsinze indi rimwe: APR itsinda umukino ubanza amaseti 3-1, Police itsinda uwo kwishyura amaseti 3-0.
Mu bagore, Police WVC na APR WVC na zo zigiye guhatanira gukomeza kuyobora Shampiyona, nyuma yo gutsinda imikino ibiri ya mbere no kugira amanota atandatu kuri buri kipe.
Police WVC ni yo iri ku mwanya wa mbere, ikurikiwe na APR WVC. Gusa mu mikino irindwi iheruka guhuza aya makipe kuva mu 2024, Police yatsinzemo ine, APR itsinda itatu.
Nubwo Police ifite imibare myiza mu mateka y’iyi mikino, APR WVC ni yo yihariye imikino yombi yahuje aya makipe muri Shampiyona ya 2025/2026, iyitsinda amaseti 3-1 muri buri mukino.
Aya makipe yombi araza gushaka intsinzi yayafasha gukomeza kwitwara neza mu ntangiriro za Shampiyona no kwereka andi makipe ko afite ubushobozi bwo guhatanira igikombe.
Mbere y’iyi mikino, saa 15:00, RP Ngoma VC izaba yakiriye REG VC mu bagabo. RP Ngoma irashaka intsinzi yayo ya mbere muri Shampiyona, mu gihe REG VC yo izaba ishaka kugera ku ntsinzi ya gatatu.
Mu mwaka w’imikino wa 2025/2026, REG VC ni yo yegukanye igikombe cya Shampiyona mu bagabo, mu gihe APR na Police zitabashije kukigeraho. Kuri iyi nshuro, zombi zirashaka kongera kwiyerekana nk’amakipe ahatanira kwegukana iki gikombe.
