sangiza abandi

Nyamagabe: Huzuye ishuri ryubakiwe impunzi ritwaye hafi miliyari 2 Frw

sangiza abandi

Mu Karere ka Nyamagabe huzuye Ishuri ry’Imyuga n’Ubumenyingiro rya Tare (Tare TVET School), ryubakiwe impunzi ziba mu Nkambi ya Kigeme n’abaturage bayituriye, ritwaye amafaranga arenga miliyari 1,8 Frw.

Iri shuri riherereye mu Murenge wa Tare, Akagari ka Gasarenda, rikaba ryaruzuye mu Ukwakira 2026, ritwaye amafaranga 1.839.703.087 Frw.

Ryubatswe ku nkunga ya Banki y’Isi, binyuze mu mushinga ugamije guteza imbere imibereho myiza n’ubukungu by’impunzi n’abaturage bazituriye, uzwi nka Socio-Economic Inclusion of Refugees and Host Communities (SEIRHC), uzwi kandi nka Jya Mbere Project.

Uyu mushinga ushyirwa mu bikorwa na Minisiteri ishinzwe Ibikorwa by’Ubutabazi (MINEMA), ku bufatanye n’Akarere ka Nyamagabe.

Amakuru ya MINEMA agaragaza ko iri shuri ryubatswe ku buso bwa metero kare 25.000, rikaba rifite ubushobozi bwo kwakira abanyeshuri basaga 600, barimo impunzi zirenga 120 n’abaturage bo mu gace riherereyemo basaga 450.

Abakobwa bazaba bagize 60% by’abanyeshuri bazaryigamo, mu rwego rwo guteza imbere uburinganire no kongera uruhare rw’abagore mu burezi bw’imyuga n’ubumenyingiro.

Tare TVET School izatangirwamo amasomo ajyanye n’ikoranabuhanga mu by’ibiti (Wood Technology), ikoranabuhanga mu nganda no gukora ibikoresho (Manufacturing Technology), ndetse n’ikoranabuhanga mu mashanyarazi (Electrical Technology).

Raporo ya Minisiteri y’Uburezi y’umwaka w’amashuri wa 2024/2025 igaragaza ko mu Rwanda hari abanyeshuri b’impunzi basaga ibihumbi 45 biga mu mashuri atandukanye.

Iri shuri ryitezweho kongera amahirwe y’impunzi n’abaturage bo mu Nkambi ya Kigeme no mu nkengero zayo yo kubona ubumenyi ngiro buzabafasha kwihangira imirimo no kubona akazi.

Mu bindi bigo by’amashuri byakira umubare munini w’abanyeshuri b’impunzi harimo GS Paysannat L iri mu Nkambi ya Mahama mu Karere ka Kirehe, yigamo abanyeshuri basaga ibihumbi 10. Iri shuri ryakira buri mwaka abanyeshuri bashya bari hagati y’ibihumbi bibiri na 2.500.

Ibi biri mu murongo wa gahunda y’u Rwanda wo guteza imbere uburezi budaheza, aho impunzi n’abaturage baturanye na zo bahabwa amahirwe yo kwiga no kwiteza imbere.

Nyamagabe: Huzuye ishuri ryubakiwe impunzi ritwaye hafi miliyari 2 Frw
Iri shuri ryitwa Tare TVET School, ryuzuye mu Ukwakira 2026, rikaba ryubatse mu Murenge wa Tare mu Kagari ka Gasarenda
Ryubatswe ku nkunga ya Banki y’Isi, binyuze mu mushinga ugamije guteza imbere imibereho myiza n’ubukungu by’impunzi n’abaturage baturanye na zo
MINEMA igaragaza ko iri shuri riri ku buso bwa meterokare 25,000, rifite ubushobozi bwo kwakira abanyeshuri basaga 600

Photos:

[fluentform id="3"]