Ikipe y’Ababiligi igizwe na Pierre de Froidmont na Axel Baumans, yegukanye umunsi wa mbere w’isiganwa ry’amagare yo mu misozi ‘Rwanda Epic 2024’.
Iri siganwa ribaye ku nshuro ya kane ryatangiye kuri uyu wa Mbere, tariki ya 21 Ukwakira 2024, kuri Mont-Kigali, ryitabiriwe n’abakinnyi 64 baturutse mu bihugu 16, barimo abanyarwanda 19.
Ikipe y’Abagabo, Ababiligi Pierre de Froidmont na Axel Baumans baje ku mwanya wa mbere bakoresheje iminota 27 n’amasegonda 12, bakurikirwa n’ikipe ya Daniel Gathof na Peter Schermann b’Abadage baje ku mwanya wa kabiri, bakoresheje iminota 28.
Ku mwanya wa gatatu haje Umunyarwanda Munyaneza Didier wafatanyine n’Umudage Banzi Bukhari, bakoresheje iminota 28 n’amasegonda 55.
Mu cyiciro cy’abagore, Ntakirutimana Marthe w’Umunyarwandakazi na Siska Marrécau w’Umubiligi, ni bo baje ku mwanya wa mbere, bakoresheje iminota 37 n’amasegonda 42.
Mu ikipe ivanze, Abanya-Espagne Oscar Pujol na Mude Rodriguez baje ku mwanya wa mbere bakoresheje iminota 36 n’amasegonda 55, bakurikirwa n’Abanyarwanda Nirere Xaverine na Muhoza Eric, bakoresheje iminota 37 n’amasegonda 25.
Mu cyiciro cy’abakina ku giti cyabo, Umutaliyani Zeno Riondato ni we witwaye neza mu bagabo, akoresheje iminota 29 n’amasegonda abiri, mu gihe Irimaso Jean Félix w’Umunyarwanda yaje ku mwanya wa gatandatu, akoresheje iminota 57 n’amasegonda umunani.
