Abanyeshuri 36 bo mu mashuri yisumbuye mu Rwanda bagiye guhagararira Igihugu mu marushanwa mpuzamahanga ya siyansi, arimo imibare (Mathematics), Ubwenge Buhangano (Artificial Intelligence), Ikoranabuhanga rya Mudasobwa (Informatics) n’Ubugenge (Physics).
Aya marushanwa azaba hagati ya azaba hagati ya Kamena na Kanama 2026, azabera mu bihugu birimo u Bushinwa, Côte d’Ivoire, Colombia, Uzbekistan na Kazakhstan.
Aba banyeshuri batoranyijwe nyuma yo kwitwara neza mu marushanwa yabereye hirya no hino mu gihugu, yitabiriwe n’abanyeshuri barenga 56,000 baturutse mu mashuri asaga 900.
Amashuri yabo arimo African Olympiad Academy, École des Sciences Byimana, Gashora Girls Academy, Rwanda Coding Academy, Maranyundo Girls School na Hope Haven Christian School.
Bazitabira amarushanwa akomeye ku rwego rw’Isi arimo International Mathematical Olympiad, Pan-African Mathematical Olympiad, International Physics Olympiad, International Olympiad in Informatics ndetse na International Olympiad in Artificial Intelligence.
Mu rwego rwo kurushaho kwitegura aya marushanwa, abanyeshuri banyura mu byiciro bitatu byo guhatanira amahirwe yo guhagararira u Rwanda. Abitwara neza kurusha abandi bahabwa amahugurwa yihariye mu bigo byabugenewe kugira ngo bongere ubumenyi n’ubushobozi mbere yo kujya guhangana n’ibindi bihugu.
Itsinda rya mbere rigizwe n’abanyeshuri batandatu ryamaze kugera mu Bushinwa aho ryitabiriye International Mathematical Olympiad, mu gihe irindi tsinda ry’abanyeshuri batandatu rizerekeza muri Côte d’Ivoire mu marushanwa ya Pan-African Mathematical Olympiad ateganyijwe kuva tariki ya 26 Kamena kugeza ku ya 4 Nyakanga 2026.
Mu mezi ari imbere, u Rwanda ruzohereza andi matsinda muri Colombia mu marushanwa y’Ubugenge, muri Uzbekistan mu marushanwa ya Informatics, ndetse no muri Kazakhstan mu marushanwa y’Ubwenge Buhangano.
Byongeye kandi, u Rwanda ruzakira irushanwa rya Pan-African Informatics Olympiad rizabera i Kigali kuva tariki ya 23 kugeza ku ya 30 Nyakanga 2026, rikazahuza abanyeshuri b’indashyikirwa mu ikoranabuhanga rya mudasobwa baturutse hirya no hino muri Afurika.
Abategura aya marushanwa bavuga ko kwitwara neza muri aya marushanwa bifungurira abanyeshuri amahirwe menshi arimo kubona buruse zo kwiga muri za kaminuza zikomeye ku isi, kwakirwa mu mashuri y’indashyikirwa, amahirwe y’ubushakashatsi ndetse no kwinjira mu bahanga mu bumenyi n’ikoranabuhanga.
Bashimira kandi uruhare rwa Leta y’u Rwanda n’abafatanyabikorwa mu guteza imbere aya marushanwa, banashishikariza amashuri menshi kurushaho kuyitabira kugira ngo abanyeshuri benshi babone amahirwe yo kugaragaza impano zabo mu masomo ya Siyansi n’Ikoranabuhanga.
