Abasirikare bo mu Ngabo za Repubulika Iharanira Demokarasi ya Congo, FARDC, batangiye guhungira mu Rwanda mu gitondo cyo kuri uyu wa Mbere, nyuma y’uko Umutwe wa M23 utangaje ko wafashe Umujyi wa Goma.
Bamwe mu basirikare benshi bashyize intwaro hasi, bahunga imirwano ikomeje gufata intera mu Mujyi wa Goma hagati y’Umutwe wa M23 na FARDC n’abarwanyi bafatanyije barimo abo muri FDLR n’abarwanyi ba Wazalendo.
Mu ijoro ryo ku Cyumweru rishyira ku wa Mbere, benshi mu basirikare ba FARDC, batanze intwaro ku Ngabo za Loni, MONUSCO, abandi bakomeza guhunga ari na ko basiga intwaro inyuma.
Ku ikubitiro, abarenga 20 babarizwaga mu Gisirikare cya FARDC binjiye mu Rwanda, bishyikirije inzego z’umutekano z’u Rwanda, batanga ibyo bari bafite birimo imbunda, amasasu n’ibindi bikoresho bya gisirikare.
Ku rundi ruhande mu gitondo cy’uyu munsi muri Kivu y’Amajyaruguru hongeye kumvikana urusaku rw’amasasu, mu gihe abaturage bo bagumye mu nzu zabo, ariko ibi byose ntacyo Leta ya RDC irabitangazaho.
Uretse abasirikare ba FARDC, binjiye mu Rwanda, ku mupaka uhuza ibihugu byombi, Grande Barrière, hari kwinjirira abakozi ba Loni bahise bashyirwa mu modoka zigana i Kigali, aho bagomba gutegerereza mu gihe bagishakirwa uburyo bwo kugera i Kinshasa.
Uretse uyu mupaka uri kunyurwaho, izindi nzira zose zirimo izo mu kirere n’izo mu mazi zisohoka mu Mujyi wa Goma, zafunzwe n’Umutwe wa M23.
