Ihuriro Alliance Fleuve Congo (AFC/M23) ryatangaje ko gutwerera ibihugu by’amahanga ibibazo by’umutekano mucye mu gihugu ari amayeri agamije guhisha kunanirwa kwa Leta ya Tshisekedi mu gukemura ibibazo by’abanye-Congo.
Umuhuzabikorwa mu bya politiki wa AFC/M23,Corneille Nanga, mu butumwa busoza umwaka yagaragaje ko ubutegetsi bwa Tshisekedi bushaka gufata ibibazo by’igihugu bukabitwerera amahanga kugira ngo buhishire kunanirwa gukemura ibibazo by’Abanye-Congo ubwabo.
Ati “Ibibazo bihari ni iby’Abanye-Congo ubwabo. Gushaka kubitwerera amahanga ni ukwita ku bimenyetso by’indwara udakemuye umuzi w’ikibazo. Ni gahunda y’uburyarya y’ubutegetsi bwa Kinshasa igamije guhisha ukunanirwa kwa guverinoma yabo.”
Yakomeje asobanura ko kwihunza ibibazo no gusaba ubufasha hanze bitazatanga igisubizo kirambye ku bibazo by’amakimbirane n’umutekano muke muri Congo.
Yakomeje agira ati“Kujya kwitotombera no gutakamba mu mirwa mikuru y’ibindi bihugu ntibizigera bikemura ikibazo cya Congo ari byo ubwicanyi, umutekano mucye udahwema kugaruka, amakimbirane ashingiye ku bwenegihugu, ruswa, ubukene, imvugo zibiba urwango, ivangura rishingiye ku moko, kunyereza umutungo wa Leta, ubujura n’ubugizi bwa nabi mu mijyi n’ibindi.”
Nangaa yagaragaje ko ibikorwa bya AFC/M23 bigamije gushaka igisubizo kirambye gishingiye ku mucyo, ku kuri, mu kubazwa inshingano no kurangiza akarengane, atari ukwihorera.
Ati“Turahamagarira Abanye-Congo gukomeza kwiyunga. Guharanira ko uburenganzira bwabo n’ubumwe bw’igihugu byubakwa biciye mu kubana neza, gushyigikirana nk’igihugu, kutavangura no gukomera ku ntego nk’abaturage banze guteshwa agaciro, mu gihe bahisemo gahunda yo kubahiriza amategeko aho guhitamo gukorera mu mucyo.”
Yongeyeho ko igihe cyo gushuka, kubeshya no gutanga amasezerano y’ibinyoma cyarangiye, kandi ko Abanye-Congo bahagaze bemye, bafite ubushake bukomeye bwo gushimangira uburenganzira bwabo, ubutabera, amahoro no kongera kubaka Leta mu mwaka wa 2026.
Yavuze kandi ko ibiganiro bya RDC na AFC/M23 byagirwagamo uruhare rwa Qatar, bikabera i Doha, byakomeza kugorwa n’ukuntu haboneka igisubizo kizima, by’umwihariko kubera ko ubutegetsi bwa Tshisekedi bwanze kongera kugirana ibiganiro na AFC/M23 haba mu buryo bw’imbonankubone cyangwa hakoreshejwe ikoranabuhanga.
