Ubwo hasozwaga ku mugaragaro imurikabikorwa ry’ubuhinzi n’ubworozi rya 19 ryari rimaze iminsi 10 ribera ku Mulindi mu Mujyi wa Kigali, hashimiwe abamurika bahize abandi mu guhanga udushya, ubufatanye ndetse no kuzana uburyo bushobora guhindura no kwihutisha iterambere ry’ubuhinzi n’ubworozi.
Ibi bijyanye n’insanganyamatsiko iri murikabikorwa ryari rifite igira iti “Twihutishe ivugururwa ry’ubuhinzi n’ubworozi binyuze mu guhanga ibishya ndetse n’ubufatanye.”
Muri ibi bihembo hashyizweho umwihariko wo guhemba urubyiruko, abari n’abategarugori ibihembo birimo amafaranga, nko kimwe mu rwego rwo kubafasha kuzamura no gushyigikira imishinga yabo iteza imbere ubuhinzi n’ubworozi, aho bahawe sheki ya miliyoni 5Frw.
Muri rusange abahize abandi mu kumurika ibikorwa byabo, bahawe ibyemezo by’amashimwe. Mu bworozi, hahembwe Kivu Choice Ltd yo mu Karere ka Nyamasheke aho yabaye iyambere mu bworozi bw’amafi bakanatanga akazi ku rubyiruko n’abagore barenga 600.
Bakurikiwe na Vision Agribusiness Fam y’i Gicumbi yo ikaba ikora ubworozi bw’ingurube mu buryo bwa kijyambere ndetse igatanga n’akazi ku mubare munini w’urubyiruko n’abagore
Ni gihe mu buhinzi hahembwe KOTUARU y’i Burera ikora ubuhinzi bw’imyumbati ikoresheje tekiniki izwi nka Zai Pit.
Zai Pit ni uburyo gakondo bwo guhinga, bukoreshwa mu kugarura ubuhehere n’uburumbuke bw’ubutaka bwangiritse cyangwa bwakomeye.
Bikorwa binyuze mu gucukura imyobo ifite ubugari bwa santimetero 20-40 n’ubujyakuzimu bwa santimetero 10-30), bikuzuzwamo ifumbire y’imborera cyangwa ibishingwe kugira ngo bifate amazi y’imvura.
Mu cyiciro cy’abakora ibijyanye no gutunganya umusaruro ukomoka ku buhinzi, iyabaye iya mbere ni Umwiza Bakery ikorera mu Karere ka Kicurkiro. Aba bakora amandazi, imigati na keke bakoresheje ibirayi n’ibijumba.
Yakurikiwe na Nezerwa Plus Ltd y’i Muhanga batunganya umutobe uvuye mu mapapayi ndetse n’inanasi.
Mu gutunganya umusaruro ukomoka ku bworozi, ababaye aba mbere ni AGIRAGITEREKA RUBAVU yo mu Karere ka Rubavu itunganya amata. Bakurikiwe n’Akagera Beekepers Union bo mu Karere ka Kayonza batunganya ubuki n’ibindi bikomoka ku nzuki
Mu bijyanye n’ubushakashatsi, Kaminuza y’u Rwanda yegukanye ibihembo bibiri, aho Ishami ry’Ubuhinzi, Amashyamba n’Ubumenyi bw’Ibiribwa riri i Musanze babaye aba mbere bakurikirwa n’Ishami ry’Ubuvuzi bw’Amatungo n’Ubumenyi bw’Inyamaswa riherereye i Nyagatare.
Muri iki cyiciro, umwanya wa gatatu wegukanywe n’Ishuri rikuru ry’u Rwanda ryigisha Ubuhinzi butangiza Ubutaka (RICA – Rwanda Institute for Conservation Agriculture).
Hahembwe kandi Rwanda Fertilizer Company y’i Bugesera nk’abahize abandi mu bijyanye no gukora no kuvanga inyongeramusaruro ndetse na KT HUB ikora ibikoresho bigezweho byifashishwa mu bworozi n’ubuvuzi bw’amatungo.
Mu rubyiruko, abari n’abategarugori bafite imishinga iteza imbere ubuhinzi n’ubworozi bamuritse muri iri murikabikorwa, na ho hatoranyijwemo abahize abandi mu guhanga udushya bagenerwa igishoro, aho bahawe ibihembo birimo amafaranga guhera kuri miliyoni 2 Frw kugera kuri 5 Frw.
Mu rubyiruko hahembwe Amazing Insects aho batunganya ifumbire bakoresheje iminyorogoto n’ibindi, bakaba bahawe miliyoni 5 Frw. Bakurikiwe na Youth Huza yakoze ikoranabuhanga rihuza umuhinzi n’isoko binyuze kuri porogramu ijya muri terefoni. Aba bahembwe miliyoni 4 Frw.
Bakurikiwe na SBG Ltd itunganya ubunyobwa ikayivanamo ibirungu bisigwa ku migati aho bahembwe miliyoni 2 Frw.
Mu bari n’abategarugori, hahembwe SEKURA Ltd y’i Kamonyi aho bakora ubworozi bw’inkwavu mu buryo bwa kinyamwuga, bakaba bahembwe miliyoni 5 Frw. Muri iki cyiciro kandi hahembwe SEKURA Ltd itunganya umutobe w’inanasi yahawe miliyoni 4 Frw ndetse na Nsabimana Chantal utunganya ubuki n’ibindi bituruka ku nzuki, wahawe miliyoni 2 Frw.
