Inararibonye muri politiki y’u Rwanda Tito Rutaremara, mu kiganiro yagiranye na RBA, yavuze ko abasenateri bashya bagiye gutorwa bagomba kugira uruhare mu kurwanya ingengabitekerezo ya Jenoside yakorewe abatutsi, iri mu bihugu by’ibituranyi ko yakomeza gukwirakwira mu bihugu byose by’akarere.
Ibi abitangaje mu gihe mu Rwanda hari gutegurwa amatora y’Abasenateri azaba kuya 16 Nzeri 2024 ahazatorwa abasenateri 12 hakurikijwe inzego z’imitegekere, naho kw’itariki ya 17 Nzeri 2024 hazatorwa abasenateri babiri bahagarariye amashuri makuru ya leta n’ayigenga.
Hari kandi n’Abasenateri umunani bagenwa na Perezida wa Repubulika, n’abandi bane bagenwa n’ihuriro nyungurabitekerezo ry’imitwe ya politiki yemewe mu Rwanda.
Rutaremara yavuze ko aba basenateri bagomba kugira uruhare mu kurwanya ingengabitekerezo ya Jenoside yakorewe abatutsi yakwirakwiye mu karere dutuyemo.
Ati “ Ni ugutangirira ku kurwanya ingengabitekerezo ya Jenoside igenda ifata indi ntera mu bihugu bidukikije, rwose abantu bakwiriye kubihagurukira bakareba uko bayirwanya kuko iyo yiyongera, igeze nko mu bihugu bibiri, kuki se ibindi byo bitayifata nk’uko? Urumva ni ikibazo kigenda gikura kidusanga, gikwiye kurangira.”
Mu burasirazuba bwa Repubulika Iharanira Demokarasi ya Congo, niho hakomeje kugaragara iyi ngengabitekerezo ya Jenoside muri iyi myaka yashize, ndetse Rutaremara avuga ko kutabihagurukira byazatuma ikwira no mubindi bihugu, ndetse no mu Rwanda ikaba yahagaruka.
Ati “Ibyiza byo ni ukongera gushaka izindi ngamba zo kubizamura. Burya nka ‘Ndi Umunyarwanda’ cyangwa ibindi bikorwa byose bakongera bakibuka bati ‘mbese ko twari tumaze kugera kuri ibi, twakora ibiki bindi kugira ngo twongere tuzamureho?’ Sena rero ikwiye kuba iya mbere kuzana icyo gitekerezo no kugiha izindi nzego zigatangira zikabikora kuko ni yo ishinzwe amahame remezo.”
